Пойтахтимиздаги Ўзбекистон стол тенниси федерацияси спорт мажмуасида аёллар ва эркаклар ўртасида яккалик, жуфтлик, аралаш жуфтлик, жамоавий ва аралаш жамоавий йўналишларда ўтказилган мамлакат чемпионати баҳслари қизиқарлилиги билан алоҳида ажралиб турди.

Икки ҳафталик шиддатли баҳсларнинг эркаклар гуруҳида 94, аёллар гуруҳида 86 нафар рейтингга эга кичик ракетка усталари чемпионлик йўлида кураш олиб борди.

Ушбу Ўзбекистон чемпионати жорий йилнинг 28 апрель-10 май кунлари Англиянинг Лондон шаҳрида бўладиган жамоалар ўртасидаги жаҳон чемпионати ҳамда 19-25 октябрь кунлари юртимизда ташкил этиладиган Осиё чемпионатида Ватанимиз шарафини ҳимоя қиладиган маҳорат эгаларини саралашга қаратилгани сабаб ҳар бир ўрин учун кечган курашлар мухлису мутахассислар эътибор марказида бўлди.

Мусобақаларнинг яккалик ўйинларида Зоҳид Кенжаев, Шоҳрух Искандаров, Жамшид Раҳимберганов ва Диёрбек Дилшодов эркаклар ўртасида, Аделина Ҳасанова,  Аружан Камолова, Диана Полегаева ва Асел Эркебаева аёллар ўртасида 2026 йилги мамлакат биринчилигининг совриндорлари, деган номга мушарраф бўлди.

Чемпионатнинг эркаклар ўртасидаги жуфтлик баҳсларида Зоҳид Кенжаев/ Диёрбек Дилшодов, аёллар ўртасидаги жуфтлик мусобақаларида Асел Эркебаева/Аделина Ҳасанова тандеми, аралаш жуфтликда З.Кенжаев/А. Камолова ғолиблик шоҳсупасига кўтарилди.

Жамоавий мусобақаларда эса Тошкент шаҳри, Андижон вилояти ҳамда Қорақалпоғистон Республикаси теннисчилари ўз йўналишларида чемпионлик мақомига эга чиқди.

Ғолиб ва совриндорлар диплом, медаль ва эсдалик совғалари билан тақдирланди.

Т.Рўзиев, ЎзА