Бугун, 21 ноябрь куни Ҳиндистоннинг Гоа шаҳрида шахмат бўйича жаҳон кубогининг ярим финалида ҳамюртларимиз Жавоҳир Синдоров - Нодирбек Ёқуббоев қарама-қаршилигига гувоҳ бўламиз. Иккинчи ярим финал баҳсида ФИДЕ байроғи остида мусобақада қатнашаётган Андрей Есипенко хитойлик Вэй Ига қарши дона суради.

2026 йилги классик шахмат бўйича жаҳон чемпионатининг номзодлар баҳсида қатнашувчи 3 нафар иштирокчи ҳамда жаҳон кубогининг 3 та юқори ўрнидан жой оладиган шахматчиларни аниқлаш йўлидаги ярим финал ўйинлари дунё аҳлининг диққат-эътиборидаги мусобақа экани билан аҳамиятли.

Биз учун эътиборли жиҳати, ярим финалда зафар қучган ҳамюртимиз жаҳон шахмат тожига даъвогарлар сафига қўшилиши қаторида, имкониятни бой берган гроссмейстеримизда 3-ўрин ва номзодлар турнирида қатнашиш ҳуқуқи сақланиб қолади.  

Бунинг учун ярим финалнинг Андрей Есипенко- Вэй И “дуэли”да мағлубиятга учрайдиган шахматчини ҳамюртимиз 4-ўрин билан кифоялантириши лозим бўлади.

Хўш, бу вазифа қайси шахматчимизнинг гарданига тушади?

Албатта, мазкур масалани ким ҳал этиши финалда ва 3-ўрин учун курашда ҳамюртларимиз қайси рақиблари билан тўқнаш келишига боғлиқ.

Нима бўлганда ҳам 2025 йил давомида жаҳон кубогининг финал босқич мусобақаларида иштирок этиш учун дунё миқёсида минглаб шахматчилар кураш олиб борган вазиятда асосий баҳсларда 206 нафар шахматчи қаторида 5 нафар ўзбекистонлик “ақл гимнастикаси” соҳиблари – Нодирбек Абдусатторов, Жавоҳир Синдоров, Нодирбек Ёқуббоев, Шамсиддин Воҳидов ва  Муҳаммадзоҳид Суяров иштирок этиш ҳуқуқига эга чиққани ўзбек шахматининг салоҳиятини намоён этди.

Жаҳон шахмат ишқибозлари нигоҳини ўзига қаратаётган кубок мусобақаларининг ярим финал ўйинлари қизиқарли, шиддатли кечиши тайин.

Шундай вазиятда финал ва 3-ўрин учун кечадиган мусобақаларда Нодирбек Ёқуббоев ёки Жавоҳир Синдоров Андрей Есипенко - Вэй И қарама-қаршилигидаги қайси бири билан дуч келиши фойдали ва самарали бўлади?

Шу хусусда, шунингдек, мамлакатимиз шахматида рўй бераётган ўзгаришлар, шахматчи қизларимизнинг Испанияда давом этаётган жаҳон чемпионатидаги натижалари, келгуси йил юртимизда ўтадиган 46-Бутунжаҳон шахмат олимпиадасига тайёргарлик каби масалалар борасида Ўзбекистон шахмат федерацияси мусобақаларни ташкил этиш менежери, моҳир мураббий, шахмат билимдони Бахтиёр Жумаев билан суҳбатлашдик.

Суҳбатни қуйидаги ҳавола орқали кўришингиз мумкин.

<iframe width="1312" height="738" src="https://www.youtube.com/embed/6aWHlh4oj-k" title="Jahon kubogi yarim finali: Sindorov-Yoqubboyev kurashida kim kuchli?" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Тўлқин Рўзиев,  

Ёқубжон Мелибоев,  

Анвархўжа Аҳмедов (видео),

ЎзА