Бугун, 17 ноябрь куни Ҳиндистоннинг Гоа шаҳрида шахмат бўйича давом этаётган жаҳон кубогининг 1/4 финал дастлабки тур ўйинлари бўлиб ўтади.

Мукофот жамғармаси 2 миллион АҚШ долларидан иборат нуфузли мусобақанинг 1/8 финалида ҳамюртларимиз Жавоҳир Синдоров, Нодирбек Ёқуббоев, ҳиндистонлик Аржун Эригаиси, хитойлик Вэй И, АҚШлик Сэм Шенкленд, ФИДЕ байроғи остида турнирда қатнашаётган Андрей Есипенко, мексикалик Хосе Мартинес ва Германия шарафини ҳимоя қилаётган Александр Донченко жаҳон кубогининг 6-босқичида иштирок этиш ҳуқуқини қўлга киритди.

1/4 финалнинг илк турида Жавоҳир Синдоров мусобақанинг 3-босқичида Нодирбек Абдусатторовдан устунликка эришган Хосе Мартинез билан ўйнаса, Нодирбек Ёқуббоев Александр Донченко билан куч синашади.

Шунингдек, 1/4 финалда Вэй И Аржун Эригаиси билан, Сэм Шенкленд Андрей Есипенко билан рўбарў келади.

Эслатиб ўтамиз, мусобақа низомига мувофиқ, 1/4  финал ўйинлари 19 ноябрга қадар давом этади.

Жаҳон кубогининг ярим финали 21-23 ноябрь, финал баҳслари эса 24-26 ноябрь кунлари ташкил этилади.

Тўлқин Рўзиев,

ЎзА