Халқаро спорт лексикасида ўзбек бокси атамасининг пайдо бўлиши ўз-ўзидан рўй бермади. Бундай шарафга эга бўлиш йўлида қанча довонлар босиб ўтилмаган дейсиз.

Бугун дунё рингларида кечаётган турли бокс кечаларида ишқибозлар юртимиз вакиллари иштирокидаги жангларни орзиқиб кутиш даражасига чиқди. Халқаро промоутерлик компаниялари кўп ҳолларда ўзбекистонлик спортчилар билан ишлаш, ҳамкорлик қилишга ошиқмоқда. Сабаби аниқ. Ўзбек боксчилари катта рингнинг жозибасини, унинг шиддатини кўрсатиб беришда Америка, Осиё ва Европанинг айрим номдор боксчиларидан устун бўлса устунки, кам эмас. 

Баҳодир Жалолов, Муроджон Аҳмадалиев, Бектемир Мелиқўзиев, Шаҳрам Ғиёсов, Ҳасанбой Дўсматов, Исроил Мадримов, Отабек Холматов, Қудратилла Абдуқаҳҳоров каби ўнлаб чарм қўлқоп усталаримизнинг катта рингдаги профессионал ҳаракати ўз даврида афсонага айланган Муҳаммад Али, Майк Тайсон, Эвандер Холифилд, Кличко, Леннокс Льюислар ва бугунги бокс юлдузлари Тайсон Фьюри, Александр Усик, Сауль Альварес, Энтони Жошуа кабилардан техник-тактик жиҳатдан ортда эмаслигини профессионал бокс мутахассислари яхши билади. 

Тарихга эътибор қаратилса, мамлакатимизда бокснинг ривожланиши асли америкалик профессионал боксчи Сидней Жаксон номи билан чамбарчас боғлиқ. Биринчи жаҳон уруши даврида тақдирнинг мураккаб кечмиши орқали Тошкентга келиб қолган енгил вазн тоифасида Америка чемпиони Жаксон мамлакатимизда ёшларга бокс сирларини ўргата бошлаган. 1928 йили асос солинган Ўзбекистон бокс федерациясига узоқ йиллар раҳбарлик қилган. 

Унинг ўнлаб эмас, юзлаб шогирдлари йиллар давомида собиқ иттифоқ чемпионлигига эришган. Жаҳон боксида “Тошкент йўлбарси” номи билан танилган боксчимиз Руфат Рисқиев ҳам Жаксоннинг шогирди ҳисобланади. 

Ўзбекистон бокс федерацияси фахрийлар кенгаши раиси, узоқ йиллар мамлакат чемпионатларида, турли халқаро мусобақаларда ҳакамлик вазифасини бажарган, 1980 йили Москвада ўтган ёзги Олимпия ўйинларида бокс мусобақаларини бошқариб боришда техник вакил сифатида фаолият кўрсатган Мирсолиҳ Сагатов билан кечган суҳбатимиз ўзбек боксининг тарихи ва бугунги ютуқлари, “Париж-2024” Олимпиадасида кутилаётган натижалар, жаҳон боксида рўй бераётган воқеликлар ҳақида бўлди. 

Суҳбатнинг тўлиқ тафсилотлари билан ЎзАнинг Youtube канали орқали танишишингиз мумкин. 

<iframe width="650" height="420" src="https://www.youtube.com/embed/I-xaddpcuYg" title="Jahon boksining rivojida Oʻzbekistonning hissasi beqiyos" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

Тўлқин Рўзиев, А.Аҳмедов (видео), ЎзА