Жамият тараққиёти ва барқарорлигини таъминлашда маърифат ҳар доим ҳал қилувчи омил бўлиб келган. Бугунги глобаллашув шароитида эса жаҳолат ва ёт ғояларга қарши кураш фақат тақиқлар билан эмас, балки билим, тафаккур ва маънавий иммунитет орқали самара беради. Шу маънода, жойларда ўтказилаётган маърифий тадбирлар алоҳида аҳамият касб этмоқда.

Ғаллаорол Абу Али ибн Сино номидаги Жамоат саломатлиги техникуми мажлислар залида Жиззах вилояти ҳокимининг 2025 йил 25 февралдаги “Жиззах вилоятида диний-маърифий муҳит барқарорлигини таъминлаш чора-тадбирлари тўғрисида”ги қарорининг ижроси доирасида давра суҳбати ўтказилди.

Давра суҳбатида жаҳолат ва турли ёт ғояларнинг инсон онги ва жамият тараққиётига салбий таъсири атрофлича таҳлил қилинди. Таъкидланганидек, жаҳолат — бу фақат билим етишмаслиги эмас, балки танқидий фикрлашнинг сусайиши, воқеликни англашда бирёқламаликка берилган ҳолатдир. ЮНЕСКО ва Ислом цивилизацияси маркази каби халқаро ва миллий-илмий манбаларда ҳам экстремизм ва радикализмга қарши энг самарали йўл сифатида таълим ва маърифат устувор экани қайд этилади.

Учрашув давомида диний бағрикенглик, миллий ва умуминсоний қадриятларга ҳурмат, қонунийлик ва маърифатли жамият барпо этиш масалаларига алоҳида эътибор қаратилди. Ёшларни илм-фанга қизиқтириш, уларнинг бўш вақтларини мазмунли ташкил этиш, ахборот маконида — айниқса ижтимоий тармоқларда — онгли ва масъулиятли фаолият юритиш муҳимлиги таъкидланди. Чунки ахборот асрида жаҳолат кўпинча нотўғри маълумот, асоссиз даъват ва сохта “ҳақиқат”лар кўринишида тарқалмоқда.

Давра суҳбати якунида иштирокчилар бундай учрашувлар ёшлар маънавий етуклигини ошириш, ижтимоий масъулиятни кучайтириш, касбий интизом ва жамоада соғлом маънавий муҳитни мустаҳкамлашда муҳим аҳамият касб этишини таъкидладилар.

Абдужалол Қаюмов, ЎзА мухбири