Қатар премьер-министрі Шейх Мұхаммед бен Абдулрахман ат-Тани Израиль мен ХАМАС арасындағы 2023 жылдың қазан айынан бері жалғасып жатқан соғысты тоқтату жөнінде келісімге қол жеткізілгенін растады.

Сонымен қатар, келісім аясында Палестиналық топ Израильдің кепілге алынған азаматтарының бір бөлігін босатуға келісім берді.

Қатар келіссөздерде негізгі делдалдардың бірі ретінде қатысып, тараптардың тікелей кездесулерін өткізу үшін өз аумағын ұсынды.

Ақпаратқа сәйкес, бейбітшілік келісімі 19 қаңтар, жексенбі күні күшіне енеді.

Келіссөздер нәтижесінде бейбітшіліктің бірінші кезеңі алты апта (42 күн) бойы жалғасатыны хабарланды. Бұл кезеңде Израиль әскерлері Газадан кезең-кезеңімен шығуы керек болады және күн сайын аймаққа гуманитарлық көмек ретінде бірнеше жүз жүк көліктері жіберіледі.

Қатар премьер-министрінің айтуынша, ХАМАС бірінші кезеңде кепілге алынған 33 адамды босатуға келісім берді. Израиль ХАМАС жауынгерлері мен оның одақтастарының қолында қалған кепілге алынғандардың жалпы санын 94 адам деп бағалаған, олардың 34-інің қайтыс болуы мүмкін екені айтылды.