Өткен жылдың 7 қазанынан бері Израиль әскері Газа секторына 85 мың тоннадан астам жарылғыш зат тастады. Өкінішке қарай, бұл бомбалар Екінші дүниежүзілік соғыс кезіндегі бомбалардан әлдеқайда қуатты.

Бұл туралы Палестина әкімшілігінің Қоршаған орта сапасы жөніндегі басқармасы хабарлады.

Соғыс пен қарулы қақтығыстар жағдайында қоршаған ортаны орынсыз пайдаланудың алдын алу халықаралық күніне орай БҰҰ Бас Ассамблеясы 6 қарашада бір жылдан астам уақыт бойы атқылауға ұшырап жатқан Газадағы экологиялық апат туралы баяндама жариялады.

— Жарылғыш заттар ауыл шаруашылығы жерлерін толықтай қиратып тастады, — делінген мәлімдемеде. — Улы химиялық заттармен ластанған жер ондаған жылдар бойы егін егуге жарамсыз болып қалды. Ең қайғылысы, 40 мыңнан астам палестиналық қаза тапты.

Сонымен қатар, департамент секторда адамдар мен кез келген тірі ағзаға қауіпті фосфор бомбасының қолданылғанын, жер асты суларына сіңген улы заттардың ұзақ жылдар бойы теріс әсер ететінін атап өтті.

Палестина әкімшілігі БҰҰ мен халықаралық қауымдастықты Израиль шабуылын тоқтатуға, қоршаған ортаны әскери мақсатта пайдаланудың алдын алуға және халықаралық заңдардың сақталуын қамтамасыз ету үшін шұғыл шаралар қабылдауға шақырды.