Фоторепортаж

Бухоролик Феруза Орипова – иқтидорли ёш педагоглардан.

Муаллима 2019 йилдан буён Абу Али ибн Сино номидаги Бухоро давлат тиббиёт институти илмий-тадқиқот ва илмий педагогик кадрларни тайёрлаш бўлимида фаолият юритмоқда. Ёш бўлишига қарамай, тиббиёт фанлари бўйича фалсафа доктори (PhD), доцент даражасини олган. Муаллиманинг илмий, педагогик ва даволаш фаолият натижалари вилоят, республика ва халқаро миқёсида ижобий баҳоланиб келинмоқда.

Бухоро давлат тиббиёт институти талабалари, тиббиёт коллежи ўқитувчилари ва ўқувчилари учун ўқув-услубий қўлланма, олий тоифали ҳамширалик иши факультети талабалари учун “Акушерликда ҳамширалик иши” фанидан ўқув қўлланмаларининг муаллифи ҳамдир. Устознинг “Соғлом она – соғлом бола”, “Контрацепциянинг замонавий турлари” дастури вилоят қишлоқ оилавий шифокорлик пунктларида кенг қўлланилмоқда.

Шунингдек, Феруза Орипова вилоят ва туманларда ҳомиладор аёллар, болалар касалликлари ва ўлимини камайтириш мақсадида шифокорлар орасида давра суҳбатлари, амалий машғулотлар ва семинарлар ўтказиб келади. Кўплаб илмий амалий конференция, конгресс ва семинарлар иштирокчиси.

Ёш педагог 2018 йилда “Истеъдод” жамғармаси томонидан ташкил этилган танловда иштирок этиб, жамғарма стипендиясига сазовор бўлган. 2021 йил “Олима аёл” республика кўрик-танловининг ғолиблигини қўлга киритган.

Тоҳир Истатов (сурат),ЎзА