Вазирлар Маҳкамасининг 2022 йил 7 июндаги “Ёшлар муаммоларини ўрганиш ва ҳал этиш тизимини янада такомиллаштириш чора-тадбирлари тўғрисида”ги қарорига ўзгартириш ва қўшимчалар киритилди.

Унга кўра, “Ёшлар дафтари”га киритиладиган ёшлар тоифалари белгиланди. Эндиликда “Ёшлар дафтари”га Ижтимоий реестрга киритилган оилаларнинг аъзолари, оиласининг ойлик даромади оила аъзоларининг ҳар бирига минимал истеъмол харажатлари миқдорининг 2 бараваридан кўп бўлмаган ёшлар киритилади. 

Ариза берувчи “Ёшлар дафтари”га кириш ва ижтимоий ёрдамлардан бирини кўрсатишни сўраб давлат хизматлари маркази, ЯИДХП (my.gov.uz) ёхуд Ёшлар ягона электрон платформаси орқали мурожаат қилади.

“Ёшлар дафтари” жамғармасидан кўрсатиладиган ёрдамлар индивидуал режага мувофиқ ижтимоий шартнома тузиш орқали тақдим этилади.

Ижтимоий шартнома шартларининг бажарилиши Ёшлар ягона электрон платформаси орқали автоматик тарзда мониторинг қилинади.

Мониторинг жараёнида ижтимоий шартномада белгиланган ҳар бир шартнинг бажарилиши ҳар ойда 100 балли тизимда баҳоланади.

Барча шартлар бўйича йиғилган балларнинг умумий йиғиндисини шартларнинг сонига бўлган ҳолда ўртача кўрсаткич аниқланади.

Камида 6 ой давомида мунтазам ижтимоий шартнома шартларини “аъло” даражада бажарган, ўртача ойлик кўрсаткичлари энг юқори бўлган минг нафаргача ёшлар ҳар йили декабрь ойида БҲМнинг 3 баравари миқдорида пул мукофоти билан тақдирланади.

Н.Абдураимова, ЎзА