Тошкент шаҳридаги Муҳаммад ал-Хоразмий номидаги ихтисослаштирилган мактабда анъанавий “Ихтирочиликка қадам” танловининг республика босқичи бошланди.

Мазкур танлов ҳар йили мактаб ўқувчилари ўртасида таълим, ахборот технологиялари, яшил энергия, экология, иқлим ўзгариши ва қишлоқ хўжалиги каби йўналишларда ўтказиб келинмоқда.

Ўзбекистон Республикаси Президентининг 2024 йил 1 апрелдаги “Ихтисослаштирилган мактаблар тармоғини кенгайтириш ва уларнинг фаолиятини янада такомиллаштириш чора-тадбирлари тўғрисида”ги фармонида умумий ўрта таълим муассасалари ўқувчилари ўртасида “Ихтирочиликка қадам” лойиҳалар танловини ўтказиш ҳамда ушбу танлов ғолибларининг лойиҳаларини амалиётга татбиқ этиш чораларини кўриш вазифаси белгиланган.

Жорий йилги танлов ҳам Мактабгача ва мактаб таълими вазирлиги тизимидаги умумий ўрта таълим муассасалари, жумладан, Президент, ижод, ихтисослаштирилган, давлат ва нодавлат умумтаълим мактабларининг 5-11 синф ўқувчилари ўртасида иқтидорли ёшларни аниқлаш ва уларни ўзлари қизиққан соҳаларга йўналтириш, илмий-техник ижодкорлиги ва ихтирочилигини рағбатлантириш, инновацион фаоллигини ошириш ва қўллаб-қувватлаш мақсадида ташкил этилди.

“Ихтирочиликка қадам” танлови тўрт босқичда ҳамда ҳар бир босқичи ўқув йилининг ҳар чорагида ўтказилиши, шунингдек, Президент, ижод, ихтисослаштирилган мактабларнинг ўқувчилари тўғридан-тўғри танловнинг учинчи (ҳудудий) босқичида иштирок этиши белгиланган. 

2024/2025 ўқув йилида “Ихтирочиликка қадам” танловида иштирок этиш учун умумий ўрта таълим муассасаларидан жами 8 минг 319 та лойиҳа ишлари ixtirochi.piima.uz  сайтида рўйхатдан ўтказилди.

Шунга кўра, 2024 йилнинг октябрь ойида танловнинг биринчи (мактаб) босқичи, декабрь ойида иккинчи (туман/шаҳар) босқичи ҳамда февраль-март ойларида учинчи (ҳудудий) босқичи ташкил этилди. 

Танловнинг учинчи (ҳудудий) босқичида жами 693 та лойиҳа ишлари иштирок этиб, улар орасидан ғолибликни қўлга киритган 42 та лойиҳа ишлари танловнинг тўртинчи (республика) босқичига йўлланма олди.

Танловнинг тўртинчи (республика) босқичида 11 та ахборот технологиялари, 5 та экология, 1 та иқлим ўзгариши, 12 та қишлоқ хўжалиги, 5 та таълим ва 8 та яшил энергия йўналишидаги жами 42 та лойиҳа ишлари иштирок этмоқда.

Энг самарали деб топилган изланиш эгалари қимматбаҳо совғалар билан тақдирланади. 

Н.Усмонова,

ЎзА