Шу кунларда мамлакатимизда меҳмон бўлиб турган Халқаро оғир атлетика федерацияси (IWF) президенти Муҳаммад Жалуд Ўзбекистон Республикаси спорт вазирлиги ва Миллий олимпия қўмитаси мутасаддилари билан учрашувда пойтахтимизда бунёд этилган “Олимпия шаҳарчаси”, юртимиз ёшлари ўртасида ўтаётган “Президент олимпиадаси” мусобақаларининг тарихий аҳамияти хусусида тўхталди, ўзбек спортининг янгиланган тизими халқаро ҳамжамият эътиборини тортаётганини таъкидлади.

Самимий руҳда ўтган учрашувда Ўзбекистон ва IWF ўртасидаги алоқаларни янада кучайтириш, келгусида халқаро мусобақалар, чемпионатлар ва нуфузли спорт анжуманларини мамлакатимизда ўтказиш борасидаги таклифлар илгари сурилди.

Халқаро оғир атлетика федерацияси раҳбари Муҳаммад Жалуд сафари якунида пойтахтимизда давлатимиз раҳбари ташаббуси билан бунёд этилган Ўзбекистондаги Ислом цивилизацияси марказига ташриф буюрди.

Меҳмон ислом цивилизациясининг бебаҳо меросини жамлаган мажмуа билан танишув асносида Ўзбекистон бебаҳо мерослар ва келажакни уйғунлаштирган мамлакат эканини, бу, тарих ва келажакни ўзида мужассам этган мазкур марказнинг мўъжизакорлигида ҳам ўз аксини топганини эътироф этди.

Т.Рўзиев,

ЎзА