Кеча Халқаро оғир атлетика федерацияси (IWF)нинг конгресс йиғилиши бўлиб ўтди.

Дунёнинг 121 та давлатидан делегатлар иштирок этган мазкур онлайн йиғилишда Ўзбекистон оғир атлетика федерацияси раисининг биринчи ўринбосари, Халқаро оғир атлетика федерацияси ижроия қўмита аъзоси Шаҳрулла Маҳмудов ва федерация бош котиби Бахтиёр Абдукаримов қатнашди.

Унда 2022 йилда оғир атлетика бўйича ўтказиладиган халқаро мусобақалар мундарижаси ҳамда жорий йилнинг 25-26 июнь кунлари Халқаро оғир атлетика федерацияси президентлиги учун бўладиган сайловларга тайёргарлик жараёнлари, Халқаро олимпия қўмитаси томонидан илгари сурилаётган талаблар кенг муҳокама қилинди.

Онлайн тарзда ўтган анжуманда Халқаро оғир атлетика федерацияси президенти вазифасини вақтинча бажарувчи Майкл Ирани бундан бир ой муқаддам Тошкентда якунланган жаҳон чемпионати ҳамда IWFнинг Ижроия қўмита йиғилиши юқори даражада ташкил этилганлигини эътироф этиб, жорий йилдаги спорт тадбирларини ташкил этишда Ўзбекистон тажрибасини андоза сифатида олиш кераклигини таъкидлади.

Конгрессда жорий йилнинг 30 апрелига қадар IWF президентлиги учун номзодларни рўйхатга олиш тартиби ҳамда унинг махсус комиссияси тасдиқланди.

Бу ҳақда Ўзбекистон оғир атлетика федерацияси матбуот хизмати хабар берди.

IWF Ижроия кенгаши томонидан қабул қилинган қарорлар ва кенг муҳокамалар натижасида конгресс ўз ишини якунлади.

ЎзА