Италия Молия гвардияси жанубий Режо-Калабрия вилоятида яшовчи фуқаронинг фирибгарлигини фош этди. Маълум бўлишича, у касаллик тўғрисидаги қалбаки маълумотномани уч йил давомида кўрсатиб юрган. Шу вақт ичида у атиги 9 кун ишлаган, дейилади молия идораси тарқатган хабарда.

Аниқлик киритилишича, “учар” эркак мамлакат шимолидаги Порденоне вилоятининг бир йўла уч ўқув юртида ишлашга улгурган. Ўзини маъмурий, техник вакил ёки ёрдамчи мутахассис сифатида таништирган ва ҳар гал бир хил тартибда иш юритган.  

Мактабдан бўлган қўнғироққа жавоб бериб, котибиятга келган ва меҳнат шартномаси тузган. Уч кун ишлаб, Режо-Калабриядаги уйига қайтган, мактабга қалбаки тиббий маълумотнома жўнатиб, бошқа мутахассислик бўйича хотиржам фаолиятини давом эттирган.

Шу тариқа у нафақат қонуний тўловни 100 фоиз олиб юрган, балки солиқ текширувидан ҳам халос бўлган. Ҳатто, маошини кўтариш учун балл ҳам тўплаган.

Маълум бўлишича, фирибгар беш нафар шифокор ҳамтовоғи ёрдамида жами 40 минг евро ишлаб олибди. Италиялик “шоввоз” касаллик таътилида бўла туриб, автомобилни узоқ муддатли ижарага бериш бўйича брокер бўлиб ишлаган ва мамлакат бўйлаб ҳаракатланган, хорижга ҳам чиққан.

Порденоне прокуратураси топшириғи билан фирибгарнинг уйи тинтув қилинганда, икки жойда ишлаётгани ҳақидаги ҳужжатлардан ташқари, 300 минг евро нақд пул топилган.