Италияда жұма күні тұрғындар жалақыны көтеру және әлеуметтік салаға қаржыландыруды арттыруды талап етіп, жалпыұлттық ереуілге шықты.

ANSA агенттігінің хабарлауынша, Италияда мемлекеттік қызметкерлер, білім беру саласының өкілдері, жұмысшылар және қоғамдық көлік қызметкерлері екі ірі кәсіподақ ұйымы – Италия еңбек конфедерациясы (CGIL) және Италия еңбек одағы (UIL) шақыруымен жалпыұлттық ереуілге шықты.

Кәсіподақтар үкіметтің келесі жылға арналған бюджетке өзгерістер енгізу жоспарын елдегі мәселелерді шешуге мүлдем жеткіліксіз деп санайды. Олар жалақы мен зейнетақы сатып алу қабілетін арттыруды, денсаулық сақтау, білім беру, коммуналдық қызметтер мен өнеркәсіптік саясатты қаржыландыруды талап етеді.

Бұған дейін, Италия Министрлер Кеңесі 2025 жылға арналған шамамен 30 миллиард еуро көлеміндегі бюджет жоспарын таныстырған еді. Жоспар орта және төмен табысы бар азаматтар үшін табыс салығы мен әлеуметтік төлемдерді қысқартуды, сондай-ақ банктер мен сақтандыру компанияларына уақытша салықты арттыруды қамтиды.

Бұл бюджет жоспары желтоқсан айында ел Парламентінде мақұлданып, 2025 жылға арналған мемлекеттік бюджетке енгізіледі деп күтілуде.