Россия Федерациясига қарши қўлланилаётган санкцияларнинг барча таъсирлари ёзда ўзини намоён қилади, деди Италия бош вазири Марио Драги куни кеча бўлиб ўтган Европа Иттифоқи саммитидан кейин уюштирилган матбуот анжуманида. Унинг аниқлик киритишича, “еттиликнинг” охирги учрашувида шундай фикрга келинган.

"Санкцияларнинг энг самарали босқичи ёзда бошланади. Бу ёзда санкциялар самараси энг юқори чўққисига етади, дегани эмас, балки энг кўп таъсири ёзда бошланади, деганидир", – деди Драги.  

Италия бош вазири Россияга қарши санкцияларнинг олтинчи пакети қабул қилинганидан қониқиш ҳосил қилганини таъкидлади. Мазкур пакетда Россиянинг денгиз орқали етказиб бераётган нефтига эмбарго жорий қилиш кўзда тутилган.  

Драгининг таъкидлашича, "яқиндагина бундай натижага эришиш имконсиз бўлиб кўринганди”. Унинг огоҳлантиришича, Россияга қарши санкциялар узоқ муддатли бўлиб, савдо муносабатларининг бутунлай ўзгариб кетишига олиб келиши мумкин.