Ўзбекистон истеъмолчилар ҳуқуқларини ҳимоя қилиш жамиятлари федерацияси ҳамда Тошкент давлат юридик университети ўртасида ўзаро ҳамкорлик меморандуми имзоланган.

Мазкур меморандум доирасида университет профессор-ўқитувчилари томонидан истеъмолчилар ҳуқуқ ва манфаатларини ҳимоя қилишга доир 11 номдаги ўқув-қўлланмалар ишлаб чиқилди. Ушбу қўлланмалар Олий Мажлис ҳузуридаги Нодавлат нотижорат ташкилотлари ва фуқаролик жамиятининг бошқа институтларини қўллаб-қувватлаш жамоат фонди маблағлари ҳисобидан ҳар бири 1 минг 500 нусхадан жами 16 минг 500 нусхада чоп этилди. 

Тошкент давлат юридик университетида мазкур қўлланмаларнинг тақдимот маросими бўлиб ўтди. Дастлаб, муаллифлар томонидан қўлланмалар аҳамияти маъруза шаклида ёритилди. Тадбир иштирокчилари ўзларини қизиқтирган саволларга жавоб олди. 

— Ушбу қўлланмалардан истеъмолчиларни қизиқтирган коммунал, савдо соҳаси, газ, электр, сув таъминоти, туризм, алоқа ва интернет ҳамда бошқа соҳаларда истеъмолчилар манфаатларига путур етказилган ҳолатлар юзага келганида қай тариқа ҳал этилиши каби саволларга жавоб олиш мумкин, — дейди Ўзбекистон истеъмолчилар ҳуқуқларини ҳимоя қилиш жамиятлари федерецияси бўлим бошлиғи Озодбек Қувондиқов. 

Мазкур қўлланмалар тақдимоти республика бўйлаб ўтказилади. 

<iframe width="650" height="420" src="https://www.youtube.com/embed/QiTaREi2byQ" title="Isteʼmolchilar huquqlariga doir qoʻllanmalar taqdimoti boʻlib oʻtdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Нигора Раҳмонова, ЎзА мухбири