Жиззах шаҳрининг “Зилол” маҳалласида истиқомат қилувчи М.О. Истемолчилар ҳуқуқларини ҳимоя қилиш жамиятлари федерациясининг 1091 қисқа рақамли ишонч телефони орқали мурожаат қилган.

Унга кўра, фуқаро “Метан Корея” МЧЖ томонидан қурилган кўп қаватли уйдан хонадон сотиб олган. Шартномага асосан, буюртмачи ўтган йилнинг ноябрь ойида уйни қабул қилиб олиши керак эди. Аммо жавобгар ваъда қилинган вақтда хонадонни эгасига топширмасдан, шартномада кўрсатилган 5.5-бандни бузган.

Ҳолат бўйича Жиззах шаҳар истеъмолчилар ҳуқуқларини ҳимоя қилиш жамияти томонидан ўрганиш ва тушунтириш ишлари олиб борилгач, мурожаатчига сотиб олган уйи топширилиб, МЧЖдан ҳар бир кечиктирилган кун учун жами 28 800 000 (йигирма саккиз миллион саккиз юз минг) сўм устама ундириб берилди.  

М.Қосимова, ЎзА