Пойтахтимизда 4 ноябрь куни “Uzgrow Tashkent 2021” халқаро кўргазмаси очилди.
Ўзбекистон Савдо-саноат палатаси, Қишлоқ хўжалиги вазирлиги, Боғдорчилик ва иссиқхона хўжалигини ривожлантириш агентлиги кўмагида Туркиянинг «SOFUAR» компания томонидан ташкил этилган ушбу кўргазмада иссиқхона ва суғориш тизимлари намойиш этилмоқда.
Мамлакатимизда боғдорчилик ва иссиқхона хўжаликларини қўллаб-қувватлаш, узумчиликни ривожлантиришда кластер тизимини жорий қилиш бўйича тизимли ишлар олиб борилмоқда. Ушбу соҳага илғор технологияларни жалб қилишда Туркия корхоналари билан ҳамкорлик катта самара беради.
Мазкур кўргазмада шу мақсадлар кўзланган. Унда Туркия ва Ўзбекистондаги етакчи компаниялардан ташқари, Исроил, Саудия Арабистони, Қозоғистон ва бошқа мамлакатлардаги иссиқхоналар ва суғориш тизимлари ишлаб чиқариш билан шуғулланувчи корхоналар қатнашмоқда.
Халқаро кўргазмада компаниялар энг сўнгги иссиқхона технологиялари, томчилатиб суғоришда фойдаланиладиган ускуналар, уруғ ва кўчатлар, агрокимёвий маҳсулотларни таклиф этмоқда.
[gallery-4544]
Тадбирда Ўзбекистон Иқтисодиёт ассамблеяси ва Экспортчилар уюшмаси бошқаруви раиси Мухтор Умаров, Туркиянинг мамлакатимиздаги Фавқулодда ва мухтор элчиси Олган Бекар ва бошқалар сўзга чиқди.
Туркия ва Ўзбекистон компанияларининг қишлоқ хўжалигидаги ўзаро ҳамкорлиги ўз натижаларини бераётгани таъкидланди. Биз буни биргина маккажўхори етиштириш мисолида кўришимиз мумкин. Олдин 1 гектар ердан йилига 12 тонна ҳосил олинган бўлса, ҳозир бу кўрсаткич 22 тоннага чиққан.
Элчи Олган Бекар ўз интервьюсида Туркиянинг кўплаб компаниялари Ўзбекистонга келишни режалаштираётгани ва эътиборли томони, улар юртимизга инвестиция киритишга тайёр эканини қайд этди.
Тадбир доирасида ўзбек ва турк компаниялари ҳамда қишлоқ хўжалиги ишлаб чиқарувчилари ўртасида В2В форматдаги учрашувлар бўлиб ўтмоқда.
Мазкур халқаро кўргазма агросоҳада фаолият бошлаётган тадбиркорларга чет эл компаниялари маҳсулотлари билан яқиндан танишиш, улар билан ҳамкорлик ўрнатиш ва тажриба алмашиш имконини бермоқда.
Улуғбек МАҲМИРЗАЕВ, ЎзА мухбири