Isroil havo kuchlarining G‘azodagi kasalxonaga uyushtirgan zarbasi natijasida XAMASning yuqori martabali yetakchisi va uning yordamchisi halok bo‘ldi. Bu haqda BBS yozgan.

Guruhning moliyaviy masalalar bo‘yicha rahbari Ismoil Barhum Xon Yunisdagi asosiy tibbiyot muassasasi – Nosir kasalxonasiga hujum payti vafot etgan. Marhum to‘rt kun avvalgi havo hujumida yaralanib, shifoxonada davolanayotgan edi.

Isroil harbiylari “keng ko‘lamli razvedka ma’lumoti yig‘ish jarayonida guruhning muhim vakiliga zarba berilgani, zararni kamaytirish uchun aniq o‘q-dori qo‘llangani”ni aytgan.

XAMAS tomonidan boshqariladigan sog‘liqni saqlash idorasi ma’lum qilishicha, “ko‘pchilik, jumladan, tibbiyot xodimlari” ham yaralangan.