Исроил мудофаа вазири Исроил Кац Ғазо жанубида 600 минг фаластинлик қочқинларни жойлаштириш учун улкан лагер қуришга тайёргарлик кўришни буюрди, деб хабар бермоқда “MSN” нашри.

Кацнинг фикрича, бу режа орқали икки йилдан бери гуманитар фалокатда яшаётган фаластинликлар устидан ХАМАС ҳаракатининг назоратини заифлаштириш мумкин бўлади.

“Der Spiegel” журналининг ёзишича, Рафоҳ шаҳри харобалари ўрнида атиги 60 кун ичида “гуманитар шаҳар” деб аталувчи мажмуани қуриш режаси ишлаб чиқилмоқда. Айни пайтда Ал-Маваси ҳудудида чодирларда яшаётган фаластинликлар янги лагерга босқичма-босқич жойлаштирилади.

Режага кўра, лагерга Исроил армияси эмас, балки “халқаро ҳамкорлар” раҳбарлик қилади, бироқ режада уларнинг кимлиги очиқланмаган. Бунда Исроил мудофаа кучлари (ЦАХАЛ) лагер атрофида “хавфсизликни таъминлаб туради”.

Лагерга кирганлар ХАМАС жангариларининг ҳудудга кириб келишининг олдини олиш учун хавфсизлик текширувидан ўтади. Кацнинг таъкидлашича, лагерга киришга рухсат этилганлар ундан ташқарига чиқа олмайди.

Халқаро ҳуқуқшунос Майкл Сфард “The Guardian” газетасига берган интервьюсида бу режа “инсониятга қарши жиноят” эканини таъкидлади.

Ҳозирда Ғазо секторида 2 миллиондан ортиқ одам яшайди, уларнинг аксарияти можаролар пайтида яшаш жойидан айрилган.

Ў.Алимов, ЎзА