ВВС хабар беришича, бу йил апрель ойи Испанияда одатдагидан ўртача 10-15 даража иссиқ  бўлди. 

 Мутахассислар буни Африкадан иссиқ ҳаво оқими ёпирилгани, шундан кейин шамол бўлмай ҳарорат ҳаддан ортиқ қизиб кетгани билан  изоҳламоқда. “Бу меъёрий ҳолат эмас, ҳаво ҳарорати бу йил бутунлай назоратдан чиқиб кетди”, — деган Испания метео идораси вакили Каэтано Торрес  Би-би-си хизматига берган интервьюсида.

Аввал кузатилмаган жазирама шароитида Испанияда мактаблар иш жадвалларини  ўзгартиришга тўғри келмоқда, одамлар қизиб кетган рельслар ёнида узоқ вақт кутиб қолмаслиги учун Мадридда метро поездлари тез-тез қатнайдиган бўлди, жамоатчилик чўмилиш ҳавзалари эса бу йил одатдагидан бир ой аввал очилди.

Метеорологлар Испанияда кузатилаётган иссиқ ҳавога бир қанча омилларни сабаб қилиб кўрсатмоқда.

Шимолий Африкада кузатилаётган иссиқ об-ҳаво оташ тўлқинини Европага ҳайдамоқда. Шу билан бирга, осмонда булут йўқлиги сабаб, қуёш нури ерларни қизитиб юборган ва далаларда нам қолмаяпти.