Ispaniyada yirik temiryo‘l fojeasi yuz berdi. Poyezdlar to‘qnashuvi oqibatida kamida 21 kishi halok bo‘ldi, yana qariyb 100 nafar yo‘lovchi jarohat oldi. Ispaniya Ichki ishlar vazirligining ma’lum qilishicha, jarohatlanganlarning 30 nafari og‘ir ahvolda bo‘lib, qutqaruvchilar voqea joyida hali ham tirik qolganlarni qidirish ishlarini olib bormoqda. Bu holat hodisaning naqadar jiddiy ekanini va qurbonlar soni ortishi ehtimoli borligini ko‘rsatadi, deb xabar beradi DW agentligi.

Fojea 18 yanvar kuni kechqurun Ispaniyaning Kordova viloyatida sodir bo‘lgan. Malagadan Madridga yo‘l olgan tezyurar poyezd harakat vaqtida relsdan chiqib, qo‘shni yo‘lga o‘tib ketgan va Uelva tomon ketayotgan qarshi poyezd bilan to‘qnashgan. Hodisaning sabablari hozircha aniqlanmagan. Ommaviy axborot vositalariga ko‘ra, ikki poyezdda jami 400 nafarga yaqin yo‘lovchi bo‘lgan.  

Ispaniya hukumati mazkur voqeani qat’iy nazoratga olgan. Bosh vazir Pedro Sanches Kordovadagi vaziyatni diqqat bilan kuzatib borayotganini bildirgan, qirollik oilasi esa halok bo‘lganlarning yaqinlariga hamdardlik izhor etgan. Bu fojeaga davlat darajasida jiddiy munosabatda bo‘linayotganini anglatadi. Qutqaruvchilar bu yerda omon qolganlar sonini aniqlash qiyinligini ta’kidlamoqda.  

Adamus munitsipaliteti rahbarining so‘zlariga ko‘ra, u hodisa joyiga birinchi bo‘lib yetib borgan. Fojea yuz bergan joydagi manzarani esa nihoyatda ayanchli, deb atagan.  

Umuman olganda, ushbu voqea nafaqat yirik transport halokati, balki xavfsizlik choralarini qayta ko‘rib chiqish, tezyurar poyezdlar harakati ustidan nazoratni kuchaytirish zarurligini ko‘rsatuvchi jiddiy ogohlantirish sifatida ham baholanmoqda. 

<iframe width="560" height="315" src="https://www.youtube.com/embed/HjvJkkKxiDw?si=Ml57UftBLHYASZ7y" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Kenja Bekjonov, Anvarxo‘ja Ahmedov, O‘zA