Испания Россия – НАТО Кенгаши мажлисида Украина, Грузия ва Молдова каби мамлакатларнинг ҳудудий яхлитлигига амал қилиш зарурлиги ҳақида баёнот берди, деб хабар тарқатмоқда Испания ташқи ишлар вазирлиги.
Мажлисда Испания томонидан халқаро ишлар бўйича давлат котиби Анхелес Морено Бау иштирок этган. У иттифоқчилар ўртасида бирлик муҳим эканини алоҳида таъкидлаган ва ўзаро қарама-қаршиликларни дипломатия йўли била ҳал этиш тарафдори эканини маълум қилган.
"Шунингдек, у бизнинг қадриятларимиз ва тамойилларимизни ҳимоя қилишга ҳамда Украина, Грузия ва Молдованинг суверенитети, ҳудудий яхлитлигини ва халқаро тан олинган чегараларини ҳурмат қилишга чақирди", – дейилади Испания ташқи ишлар вазирлиги тарқатган хабарида.
Чоршанба куни Брюсселда Россия – НАТО Кенгашининг йиғилиши бўлиб ўтди. Ундан олдинроқ, яъни душанба куни Женевада Россия билан АҚШ делегацияси ўртасида музокара бўлиб ўтганди. Пайшанба куни Венада РФ-ЕХҲТ форматида музокаралар бўлиб ўтиши режалаштирилган.