Испания ҳукумати иқтисодиётга инвестиция киритган хорижлик фуқароларга мамлакатда яшаш ҳуқуқини берувчи визани тарқатишни тўхтатиш қарорини қабул қилди. Бу хабарни Испания ташқи ишлар вазирлиги РИА Новостига маълум қилган.

Европа Иттифоқига кирмайдиган мамлакатлар фуқаролари учун Испанияда яшашга виза олиш шартларидан бири мамлакат иқтисодиётига инвестиция киритиш ҳисобланар эди. Камида 500 минг еврога кўчмас мулк сотиб олиш, акцияга ёки компаниялар ҳиссасига камида 500 минг евро инвестиция қилиш, Испания давлат қарзидан камида икки миллион евро харид қилиш шулар жумласидандир. Иқтисодий инқироз даврида, яъни 2013 йилдан бошлаб “олтин виза” дастури ишга туширилганди. Россиянинг мингга яқин фуқаролари ушбу дастур бўйича Испанияда яшаш ҳуқуқини қўлга киритди. Олинган ҳар ўнта визанинг тўққизтасида россияликлар кўчмас мулк сотиб олган, дейилади ABC газетаси тарқатган хабарда.

Бундан аввалроқ бир нечта мамлакатлар ҳам, жумладан, Буюк Британия ва Португалия “олтин виза” бериш тўхтатилгани ҳақида эълон қилган эди.