Испания ташқи ишлар вазири Хосе Мануэль Альбарес “Europe Today” дастурига берган интервьюсида АҚШ ва Исроилнинг Эронга қарши уруши БМТ келишувлари ва халқаро ҳуқуқ меъёрларига зид деб атади, дея хабар берди Euronews.

Альбарес  “Europe Today” дастурида сўзлар экан, АҚШ ва Исроилнинг Эронга нисбатан ҳаракатлари БМТ Низомига ва халқаро ҳуқуқ меъёрларига   мос келмаслигини таъкидлади.  

Шунингдек, Альбарес жонли эфирда Эроннинг Яқин Шарқдаги қатор давлатларга қарши жавоб зарбаларини ҳам қоралади ва кескинлашув шароитида дипломатия йўлига қайтишга чақирди.  

Унинг таъкидлашича, можаро кенгроқ ҳудудга тарқалаётгани сабабли Испания ва Европа Иттифоқи мувозанатга чақирувчи овоз бўлиши керак. 

Испания бош вазири Педро Санчес Европа Иттифоқидаги АҚШ ва Исроил зарбаларини очиқ қоралаган ягона етакчи ҳисобланади. Санчес ҳукумати Европадаги Дональд Трампнинг ташқи сиёсатини энг қаттиқ танқид қилувчи ва Исроилнинг Ғазодаги урушига қатъий муносабат билдирган ҳукумат сифатида танилган.  

Альбарес шунингдек, Исроил ташқи ишлар вазири Гидеон Саарнинг Испанияни дунё золимлари томонида туришда айблаган сўзларига муносабат билдириб, уни асоссиз ва кулгили, деган.  

“Дунёда бундай гапни айта оладиган давлатлар жуда кам. Биз халқаро майдонда изчил овозга эгамиз ва кимгадир ёқадими-йўқми, шу йўлдан давом этамиз”, - деди Альбарес.

<iframe width="650" height="420" src="https://www.youtube.com/embed/fV1SldB_baQ" title="Ispaniya: AQSH va Isroilning Eronga hujumi xalqaro qonunga zid" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Анвархўжа Аҳмедов, ЎзА