Испания Вашингтон босимига бўйсуниб Эронга зарба бериш учун АҚШга ҳарбий базаларини тақдим этгани ҳақидаги хабарларни рад этди, деб ёзди DWнашри.

Испания ҳукумати бу гаплар ҳақиқатга тўғри келмаслигини билдирди. 4 март куни ташқи ишлар вазири Хосе Мануэль Альбареснинг айтишича, Мадриднинг позицияси ҳали ҳам ўзгармаган.

Оқ уй матбуот котиби Кэролайн Ливитт Испания АҚШ ҳарбийлари билан ҳамкорлик қилишга рози бўлганини айтган эди. Унинг сўзларига кўра, “улар кеча президентнинг гапларини аниқ ва равшан эшитишди”. Бу ерда у АҚШ президенти Дональд Трампнинг Мадрид билан савдо муносабатларини узиш ҳақидаги таҳдидини назарда тутган.

Испания ташқи ишлар вазири Хосе Мануэль Альбареснинг таъкидлашича, Испания АҚШ билан “ҳарбий ҳамкорлик қилишга тайёр” деган хабарлар мутлақо ҳақиқатга тўғри келмайди.

Испания бош вазири Педро Санчес эса мамлакат позициясини бир оғиз сўз билан “урушга йўқ деймиз” деб таърифлаган.  

Испания НАТО га аъзо давлатлар ичида АҚШ ваИсроилнинг Эронга қарши ҳарбий амалиётига қарши чиққан ягона давлат бўлди.

Шунингдек, Испания НАТО давлатлари ичида 2035 йилгача ҳарбий харажатларни  ошириш талабини қабул қилмаган ягона мамлакат бўлиб қолмоқда.  

Испания ва АҚШ ўртасида ана шундай баҳсли муносабатлар юзага келаётган бўлсада, Европа Иттифоқи Испанияни АҚШ томонидан бўлиши мумкин бўлган савдо санкцияларидан ҳимоя қилишга тайёрлигини билдирган.

<iframe width="650" height="420" src="https://www.youtube.com/embed/AqxNAHESFRg" title="Ispaniya AQSH bilan harbiy kelishuvni rad etdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Анвархўжа Аҳмедов, ЎзА