Туман кенгаши депутати, тадбиркор Ойниса Қаршибоева томонидан ташкил этилган мазкур марказда тикувчилик касбини эгаллаган қизларни иш билан таъминлаш ҳам йўлга қўйилган. Шу мақсадда мактабгача таълим муассасалари билан матрас ва чойшаблар тикиб бериш учун шартномалар тузилмоқда. 

– Марказимизда тикувчиликни ўрганган хотин-қизларнинг бандлигини таъминлашда уларнинг оилавий шароит ва имкониятлари ҳам ҳисобга олиб шароит яратиб беришга ҳаракат қилаётирмиз, – дейди Ойниса Қаршибоева. – Уйда бола тарбияси билан шуғулланиб, ишлаш истагида бўлганларни буюртмалар, хомашё ва зарур материаллар билан таъминлаш цехимиз томонидан йўлга қўйилди. Бу бола тарбиясидан ажралган ҳолда ишлаш имконияти бўлмаган аёллар учун жуда яхши имконият бўлди. 

Яқинда Республика маҳалла ва оилани қўллаб қувватлаш вазирлиги ишчи гурухи аъзолари туманда хотин-қизлар бандлигини таъминлашда амалга оширилаётган ишларни ўрганиш давомида ушбу тикувчилик цехида бола тарбиясидан ажралмаган ҳолда ишлашга имконият яратилиб берилган аёллардан 3 нафарининг хонадонига бориб, иш фаолияти билан танишди. “Темир дафтарга”га киритилган оиладаги аёллар яратилган қулайлик туфайли уйда ишлаб доимий даромадга эга бўлгангидан мамнунлигини таъкидлади. 

Ўрганишлар хотин-қизлар бандлигини таъминлашда амалга оширилаётган бу каби ишлар оилаларни камбағалликдан чиқаришда муҳим аҳамиятга эга бўлаётганлигини кўрсатди. Бу ишда тадбиркорлар фаол иштирок этиб, ҳар бир оиланинг шароит ва имкониятлардан келиб чиқиб ёндошилаётгани яхши самара бермоқда. 

Ишчи гурух фуқаролар йиғинлари фаолияти билан танишиш давомида ижтимоий ҳимояга муҳтож оилалардаги хотин-қизларнинг бандлигини таъминлашда, уларнинг оилавий шароитларни ҳисобга олиб, қулайликлар яратишга эътибор қаратди. Бу йўналишда хотин-қизларни касб-хунарга ўргатиш, тадбиркорлик соҳасига кенг жалб этишда мавжуд тажрибалардан кенг фойдаланиш тавсия этилди.