Юртимизда чора-тадбирлар шошма-шошарликка йўл қўйилмасдан, саросимага тушмасдан, ҳар томонлама пухта ўйланган ҳолда амалга оширилмоқда. Бундан қувониш лозим.

Зеро, коронавирусга қарши карантин эълон қилинган кундан бошлаб ўтган муддатда эришилган ютуқлар бизнинг давлатимиз ишончли бошқарилаётганини яна бир карра тасдиқламоқда.

Мен ҳам шу юртнинг оддий фуқароси сифатида кунлик интернет хабарларини таҳлил этиб бормоқдаман. Жорий йил 6 апрелдан бошлаб вирусга чалинганлар сони камая бошлаганида жуда хурсанд бўлдим.

Орадан кўп ўтмасдан — 12 апрель куни бу борадаги кунлик кўрсаткич яна кўтарилди. Шу куни вирусга чалинганлар 136 нафарга ошиб, юртимизда жами 865 нафарни, даволанганлар эса 66 нафарни ташкил этди.

Одатда, бирор ишга қўл урсам, севимли шоиримиз Ҳамид Олимжоннинг қуйидаги мисраларини такрор-такрор эслайман:

“Буни мен ҳам билолганим йўқ, 

Бу юмушни қилолганим йўқ,

Лекин ишонч билан тўлиқман, 

Шу ишончим билан улуғман”.

Вирусга чалинган ҳамда бутунлай соғайган кишиларга оид кунлик интернет маълумотларини таҳлил қилган ҳолда навбатдаги беш кунлик соғайиш жадвалини белгилаб чиққандим: тахминимга кўра, 13 апрель куни 20 нафар, 14 апрелда 17 нафар, 15 апрелда 6 нафар, 16 апрелда 16 нафар, 17 апрелда 30 нафар, ушбу ҳафта давомида эса 89 нафар киши соғайишини кутган эдим.

Тахминим дастлабки 13 апрелда деярли тўлиқ тасдиқланди: шу куни 19 нафар киши бутунлай соғайди. Фикрларим юзасидан курсдошларимга телеграм орқали хабар бериб, ўзимча уларга далда берган бўлдим.

Қолган кунларда ҳам тахминимда катта фарқ бўлмади, бешинчи кун, яъни 17 апрелда 27 нафар ҳамюртимиз соғайганини билиб қувондим, чунки мен 89 киши соғайишини кутгандим, ваҳоланки, шу даврда 90 киши вирусдан бутунлай фориғ бўлди.

Касбим бўйича математик ва юристман, бироқ мазкур ҳисоб-китобларим жуда катта билим талаб қилмади.

Мен, аввало, юртимизда амалга оширилаётган чора-тадбирлар тахминий эмас, балки илмий асосланганига ишонч ҳосил қилдим. Кунни кун, тунни тун демасдан ишлаётган шифокорларимиз мутлақо хато қилмайди деб ўйладим. Қолгани эса кузатув ва оддий арифметика эди, холос.

Буларни шунинг учун айтаяпманки, бугун амалга ошаётган ишларнинг натижаси ижобий бўлишига мен ишондим, Сиз ҳам ишонинг! Сиз ҳам COVID-19 балосидан юртдошларимиз ҳар томонлама мантиққа асосланган улкан меҳнат туфайли тузалаётганига амин бўлинг.

Бизга карантин туфайли қўйилган ҳар бир талабни тўла бажаринг, чекловларга қатьий риоя қилинг, кўнгилни кенг қилинг, тушкунликка тушманг, умидсизланманг, келажакка ишонч билан боқинг.

Ахир, умрини халқимизнинг бахт-саодатига бахш этган оташин шоиримиз Чўлпон бир аср муқаддам айтганидек: “Халқ денгиздир, халқ тўлқиндир, халқ кучдир”.

Ўйлайманки, бугунги кунда халқимизнинг ишончи ҳар нарсадан улуғдир!