Фарғона тумани Лоғон қишлоғида иш бошлаган “Vodiy-Shoes” масъулияти чекланган жамияти шаклидаги Ўзбекистон – АҚШ қўшма корхонаси иш бошлаганига кўп вақт бўлгани йўқ. Бу ерда тайёрланаётган эркаклар, аёллар ва болалар пойабзаллари қисқа вақтда ички ва ташқи бозорда ўз харидорларини топди. Маҳсулотлар пишиқ-пухталиги, бежирим кўриниши билан ажралиб туради.

Қўшма корхонада умумий қиймати 8,5 миллион доллар бўлган лойиҳа амалга оширилиб, Германия, Чехия ва Италиядан замонавий ускуна ва технологиялар олиб келинди.

– Маҳсулотлар асосан маҳаллий хомашёдан тайёрланади, – дейди корхона бош технологи Елена Крамская. – Айни кунда 300 нафардан ортиқ маҳаллий ёшлар бандлиги таъминланди. Иш икки сменада олиб борилиб, кунига 2 минг жуфтга яқин бежирим пойабзаллар ишлаб чиқаряпмиз. Айни кунда Россия, Қозоғистон, Саудия Арабистони, Афғонистонга сара маҳсулот экспортини йўлга қўйиш борасида иш олиб боряпмиз.

Корхона томонидан янги техника ва жиҳозларни ишлаб чиқаришга жорий этиш, экспортга алоҳида эътибор қаратилмоқда. Шу мақсадда Германиядан пойабзаллар учун чарм тайёрлаш ускунаси олиб келинди. Эндиликда мижозлар талаб ва истакларига мос бўлган турли ўлчам ва кўринишдаги сифатли тагчармлар ишлаб чиқариш имконияти мавжуд. Бу маҳсулот ишлаб чиқариш ҳажмини ошириш, сифатини янада яхшилашда муҳим ўрин тутади.

Кенг ва ёруғ хоналардаги ишлаб чиқариш дастгоҳларини маҳорат билан бошқараётган ёшлар кунлик иш унуми, меҳнатга яраша манфаатдорликдан мамнун.

– Лоғон агросаноат касб-ҳунар коллежида ўқиб, мазкур қўшма корхонага ишга кирдим, – дейди бичув цехи ишчиси Шаҳноза Пардаева. – Бу ерда меҳнат қилиш, дам олиш билан боғлиқ барча шароит яратилган. Иш ҳақимизни ўз вақтида оламиз, бепул тушлик, тиббий хизмат, ишга келиб-кетишимиз учун махсус автобус ажратилган.

Олис қишлоқда амалга оширилаётган ислоҳотлар аҳоли турмуш тарзини яхшилаш, фаровонлигини юксалтиришга хизмат қилмоқда.