Фарғона вилояти Тошлоқ туманидаги “Водий Марҳабо” МЧЖ автоклав газоблок ишлаб чиқариш корхонасини 2024 йилда қуриб фойдаланишга топширган эди.

Ўзбекистонда уй-жой қуриш ҳажми сўнгги йилларда бир неча мартага ошиб кетди. Қолаверса, янги турдаги қурилиш материаллари жорий этилди. Шу икки омил Тошлоқдаги автоклав газоблок заводини маълум муддатга тўхтатиб, ишлаб чиқариш қувватларини оширишни тақозо этди.

– Илгари бир кеча-кундузда 250-300 куб газоблок ишлаб чиқарар эдик. Талаб кескин ошгани учун 4 та автоклавга яна 2 та янгисини қўшиб 6 тага етказяпмиз, – дейди иш юритувчи Дилмурод Исмоилов. – Энди корхонанинг бир кунлик қуввати 450-500 кубометрга етади.

Бунинг учун Тошлоққа Хитойдаги доимий ҳамкорларидан янги ускуналар сотиб олишди. Мавжуд линияни қайта монтаж қилиб автоклавлар йўлагини узайтирмоқдалар. Мутахассислар Ўзбекистонда кўп қаватли уй-жой қурилишида ғиштдан тамомила воз кечиб, газоблокка ўтилаётганини таъкидлашмоқда. Сабаби у ҳам арзон, ҳам қурилиш муддатини қисқартиради.

“Водий Марҳабо” МЧЖнинг автоклав газоблок заводи Тошлоқдаги хорижий инвестиция иштирокидаги ўнлаб ишлаб чиқариш корхоналарининг бири, холос.

– 2025 йилда туманда жами 111 млн.долларлик хорижий инвестиция ўзлаштирилган бўлиб, унинг 89 млн. доллари саноат йўналишига тўғри келади. Инвестицион лойиҳалар туфайли амалга оширилган экспорт маҳсулотлари қиймати эса 28,9 млн.долларни ташкил этди, – дейди Инвестиция бошқармасининг Тошлоқ туманидаги вакили Илҳом Абдулазизов.  

<iframe width="815" height="458" src="https://www.youtube.com/embed/nmWUoOVqEdI" title="Ишлаб чиқариш қуввати оширилмоқда (+видео" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳаммаджон Обидов, Элёр Олимов (видео, сурат), ЎзА