Ишлаб чиқариш корхоналари табиий газ билан узлуксиз таъминланади
Ана шундай корхоналардан бири Олтинкўл туманидаги “GOLD GROWN PHARMA” масъулияти чекланган жамиятига қарашли тиббиёт қўлқоплари ишлаб чиқариш корхонасидир.
Андижон вилоятидаги 230 мингга яқин табиий газ истеъмолчиларига сифатли хизмат кўрсатилмоқда. Айниқса, 2 мингга яқин улгуржи истеъмолчилар – турли мулкчилик шаклидаги ишлаб чиқариш корхоналарини ўз вақтида табиий газ билан таъминлаш масаласига алоҳида эътибор қаратилмоқда.
Айни кунда улгуржи газ истеъмолчиларининг салмоқли қисмини экспортчи корхоналар ташкил этади. Ана шу корхоналарнинг барқарор ишлаши нафақат вилоят, балки мамлакатимиз иқтисодиёти барқарорлигини таъминлашда муҳим аҳамият касб этади.
Ана шундай корхоналардан бири Олтинкўл туманидаги “GOLD GROWN PHARMA” масъулияти чекланган жамиятига қарашли тиббиёт қўлқоплари ишлаб чиқариш корхонасидир.
Бугунги карантин шароитида мазкур корхона тўла қувват билан фаолият кўрсатмоқда. Асосан, тиббиёт қўлқоплари, зарарсизлантиришда ишлатиладиган воситалар ва тиббиёт пахтасини ишлаб чиқараётган корхонанинг маҳсулотларига бўлган талаб бугун ҳар қачонгидан ҳам юқори.
Корхона асосан тиббиёт қўлқоплари ишлаб чиқаришга ихтисослашган. Лекин мамлакатимиздаги бугунги эпидемиологик вазиятдан келиб чиқиб, бу ерда шу кунларда антисептик геллар ва тиббиёт пахтаси ишлаб чиқариш ҳам йўлга қўйилди. Ойига 9 миллион дона тиббиёт қўлқопи, 1 миллион дона антисептик гель ва 240-250 минг дона қадоқланган тиббиёт пахтаси ишлаб чиқараётган корхона маҳсулотлари айни кунда харидорларга пешма-пеш етказиб берилмоқда.
Корхонанинг тўла қувватда фаолият юритишини таъминлаш учун “Ҳудудгаз-Андижон” масъулияти чекланган жамияти томонидан зарур ҳажмдаги табиий газ ўз вақтида ва узлуксиз етказиб берилмоқда.