Тара Рид исмли аёл Жо Байден сенатор бўлган ўтган аср 90-йилларида унинг ёрдамчиси вазифасини бажарган. Негадир, орадан анча вақт ўтгач, яъни 2020 йил баҳорида жувон Байденни 1993 йилдан бошлаб ўзига тазйиқ ўтказишда айблаб, баёнот берди.
Тара айтишича, Жо Байденга қарши кўрсатма бергандан кейин у ҳамма нарсаси, жумладан ишидан ҳам айрилган. Шундан кейин Америкада яшаш хавфли, деб ҳисоблаган Рид 2023 йил Россияга кўчиб ўтган.
“Washington Post” газетаси тахминан 20 нафар ўша йиллари Байденнинг ёнида ишлаганлар билан суҳбат ўтказган ва айбловни тасдиқловчи ҳеч қандай далил тополмаган. Аксинча, газета суриштирувида аёлнинг таржимаи ҳолига доир қатор зиддиятлар, масалан олий маълумотли эмаслиги аниқланган. Жувон эса АҚШ матбуоти ва Демократик партия амалдорлари унинг арзига эътибор бермаганидан шикоят қилган.
2024 йил июль ойи ўрталарида Тара Рид ушбу мавзуни яна кўтарди. Яъни, АҚШга қайтиб, Конгрессга Байденнинг ўзига нисбатан “жинсий зўравонлиги” бўйича шикоят аризаси топшириш ниятини билдирган. Қизиғи, бу баёнот Байден президентликка даъвогарликдан чекинганидан бир неча кун олдин янграган.
Тара Рид Россияга келгач, давлат оммавий ахборот воситаларида чиқишлар қилган. Жумладан, 2024 йил Москвага келган Такер Карлсонга ҳам интервью берган.
Шунингдек, Кремль назоратидаги RT телеканали билан ҳамкорлик қилган. “Meduza” нашри ёзишича, РФ фуқаролигини олиш учун, одатда, беш йил шу мамлакатда яшаш талаб қилинади. Фақат давлат раҳбари муҳим, деб ҳисоблаган ҳолатлар бундан мустасно. Айнан шундай имтиёз Ридга нисбатан ҳам қўлланган, чунки у зарур муддат яшамаган бўлса-да, Россия фуқаролик паспортига эга.
Кўпчиликни қизиқтирган яна бир савол бор: Жозефга қарши кўрсатма асосида сиёсий мазмун яширин, дейиш мумкинми? Ахир, бугун Байден сиёсий саҳнада йўқ-ку! Қолаверса, аввалги баёнотлар ҳам тасдиғини топмаган бир пайт Тара эски масалани яна қўзғашига сабаб нима экан?
<iframe width="650" height="420" src="https://www.youtube.com/embed/7Nqc6HMzY3Q" title="Ishdagi ishq yoki Baydenga qarshi fitna" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Улуғбек Тўхтаев, ЎзА