Навоий шаҳридаги Алишер Навоий номидаги истироҳат боғида Тадбиркорлар ва ишбилармонлар ҳаракати – Ўзбекистон Либерал демократик партияси вилоят ташкилоти томонидан “Ватан учун, миллат учун, халқ учун!” шиори остида “Ишбилармон аёл – 2025” кўрик-танловининг ҳудудий босқичи бўлиб ўтди.

Сўнгги йилларда мамлакатимизда кичик бизнес ва тадбиркорликка кенг имкониятлар яратилиб, ёшлар ва хотин-қизлар учун бир қатор имтиёзлар берилмоқда. Партия ҳам ушбу ислоҳотларга ҳамоҳанг тарзда тадбиркор аёлларни саралаб, кашф этиш ҳамда уларнинг тажрибаларини оммалаштиришга алоҳида эътибор қаратган. 

Танловда дастлаб тадбиркор аёллар томонидан ишлаб чиқарилган маҳсулотлар кўргазмаси бўлиб ўтди.

Унда тадбиркор, ишбилармон, ҳунарманд, фермер хотин-қизларнинг маҳсулотлари, миллий йўналишдаги либослари намойиш этилиб, ҳамкор ташкилотлар, Олий Мажлис Қонунчилик палатаси, Халқ депутатлари вилоят ва шаҳар Кенгаши депутатларидан иборат ҳакамлар ҳайъати томонидан баҳоланди. 

Баҳолаш жараёнида иштирокчиларнинг лойиҳа Низомига мувофиқ хотин-қизлар учун қўшимча янги иш ўрни яратганлиги, “Аёллар дафтари”га киритилган хотин-қизларни касб бўйича ўқитган, бандлигини таъминлаган ва ҳаётда ўз ўрнини топиб кетишида кўмаклашганлиги, ишлаб чиқарган маҳсулотларига ўз брендининг мавжудлиги, фаолият туридан келиб чиқиб экспортга йўналтирилган ёки импорт ўрнини босувчи маҳсулот ишлаб чиқариш, аҳолига кўрсатаётган хизматининг сифати ҳамда фаолиятида ҳаётга татбиқ этиб келаётган янги инновацион ғоялари, шунингдек, партия томонидан ўтказилган семинар ва ўқувларда иштирок этиб келаётганлигига ҳам алоҳида эътибор қаратилди.

Вилоятдаги 11 та шаҳар ва туманлардан иштирокчи қатнашган танлов якунида Кармана тумани вакили - “Кармана Само юлдузлари”, “Навоий Сумайя” МЧЖ ҳамда “Даврбек-Даврон келажаги” хусусий корхоналари таъсисчиси Шоҳиста Ҳикматова биринчи ўринни эгаллади.

– Ушбу танловда биринчи марта иштирок этдим, – дейди Ш.Ҳикматова. – Фаолиятимни 1999 йилда якка тартибдаги тадбиркор сифатида бошлаган бўлсам, бугунги кунга келиб 3 та корхонанинг таъсисчисига айландим. Ҳозирда 2 та меҳмонхоналар тармоғи, 3 та супермаркет ва 3 та умумий овқатланиш шохобчаларида 120 дан ортиқ ишчи-ходим фаолият кўрсатади. Айни пайтда туман марказида 3 юлдузли меҳмонхона қурилишини бошлаб юборганмиз ва меҳмонхонанинг ишга тушиши натижасида камида яна 70 га яқин кишининг бандлиги таъминланади. Танлов давомида ўзим каби тадбиркор аёллар билан танишдим. Айрим маҳсулотларни харид қилиш борасида тадбиркорлар билан шартномалар имзоладик. Бу танлов мен учун жуда манфаатли, фойдали танлов бўлди. 

Танловда оилавий тадбиркорлик, кичик бизнес ва хусусий тадбиркорлик, фермерлик фаолиятида салмоқли ютуқларга эришиб, аҳоли бандлигига кўмаклашишда фаоллик кўрсатиб келаётган бир гуруҳ фаол тадбиркор аёллар ҳам турли номинациялар бўйича тақдирланди.

А.Бўриев, ЎзА мухбири