Ироқ давом этаётган Россия ва Украина можароси муносабати билан ўз фуқаролари рус армиясига ёлланишини чеклаш бўйича янги чоралар эълон қилди.

Январь ойида Миллий хавфсизлик бўйича маслаҳатчи Ал-Арожий бошчилигида ташкил этилган Ёллашга қарши қўмита аҳолини хорижий қуролли кучларга жалб этувчи тармоқ ва тузилмаларга нисбатан Жиноят кодексини қўллаш бўйича таклифлар ишлаб чиқди. Яъни, эндиликда чет эл ҳарбий ҳаракатидаги иштирокни жазолаш, молиялаштириш ва ёллаш тармоқларига қарши курашиш, шунингдек эксплуатация қилиниш, фронт чизиғига юборилишга дуч келадиган кўнгиллиларни можарога аралашиш хавфидан огоҳ этиш кўзда тутилмоқда. Қўмита қарори Бош вазир Ал-Суданийга тасдиқлаш учун тақдим этилди.

Оммавий ахборот воситалари хабарига кўра, ҳозиргача тахминан 50 000 ироқлик Россия кучлари билан бирга жанг қилиш учун ёлланган. Норасмий статистика эса тахминан 5000 рақамини кўрсатмоқда. Улардан 3000 нафари Россия армиясида, 2000 нафари Украина томонида жанг қилмоқда.

С.Раҳимов, ЎзА