Инсоннинг имконияти унинг кўришида, эшитишида ёки жисмоний ҳолатида эмас, балки қалбидаги куч, иродаси ва билимга бўлган интилишидадир. Ҳар бир инсонда ўз соҳасида порлаш, жамиятда муносиб ўрин эгаллаш имконияти бор.

Кўриш бўйича ногиронлиги бўлган инсонлар ўртасида ташкил этилган “Заковат” интеллектуал ўйини ҳам нафақат билим ва мантиқий фикрлашни синаш, балки жамиятдаги фаоллик, ўзаро дўстлик ва ишонч муҳитини мустаҳкамлашга хизмат қилмоқда.

Танловнинг биринчи босқичи республиканинг 14 та ҳудудида ўтказилиб, унда 26 та жамоа иштирок этди. Ўйинлар давомида иштирокчилар ўз билим, тафаккур ва жамоавий ишлаш кўникмаларини намоён этди.

Баҳолаш натижаларига кўра, Тошкент шаҳри, Хоразм, Бухоро, Қашқадарё, Андижон ҳамда Самарқанд вилоятининг  жамоалари  юқори балл тўплаб, республика босқичида иштирок этиш ҳуқуқини қўлга киритди.

Мазкур жамоалар иштирокида билимлар беллашувининг республика босқичи  29 октябрь куни Тошкент шаҳридаги “Заковат арена” клубида, “Заковат” интеллектуал клуби билан ҳамкорликда ўтказилди.  

Тадбир давомида иштирокчилар билим, тезкор фикрлаш ва жамоавий ишлаш қобилиятларини намойиш этди. Якунда ғолиб жамоалар ва фаол иштирокчилар Ўзбекистон Кўзи ожизлар жамияти ҳамда “Заковат” интеллектуал клуби томонидан диплом ва эсдалик совғалари билан тақдирланди.

<iframe width="640" height="420" src="https://www.youtube.com/embed/7UqfHBkyscs" title="Irodali insonlar “Zakovat” maydonida" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Н.Раҳмонова,

Н.Абдувоитов (видео), У.Тўхтаев (монтаж), ЎзА