Мамлакатимизда иқтисодий ночор корхоналар ва тадбиркорлик субъектларини молиявий инқироз ҳолатидан олиб чиқиш, улар фаолиятини қайта тиклаш ҳамда соғломлаштириш масалаларида амалдаги қонунчилик нормалари ва жорий тартиблар етарлича самара бермаяпти.

Ўз навбатида, мазкур амалиёт натижалари Жаҳон банкининг “Бизнес юритиш” бўйича рейтингида юртимизнинг муносиб ўрин эгаллашига салбий таъсир кўрсатмоқда.

Олий Мажлис Қонунчилик палатасида ўтказилган навбатдаги мажлисда депутатлар томонидан соҳадаги муаммоларни бартараф этиш мақсадида ишлаб чиқилган “Тўловга қобилиятсизлик тўғрисида”ги қонун лойиҳаси биринчи ўқишда кўриб чиқилди.

Қайд этилганидек, мазкур қонун лойиҳаси Ўзбекистон Республикасининг “Банкротлик тўғрисида”ги Қонуни асосида ишлаб чиқилган бўлиб, 17 та боб ва 252 та моддадан иборат. Лойиҳа билан жисмоний шахснинг тўловга қобилиятсизлик амалиётини жорий этиш ва тартибга солиш, қарздорнинг (жисмоний шахснинг) ойлик даромадларидан келиб чиқиб, қарздорликни тўлов графиги асосида бўлиб-бўлиб тўлаш тартиби белгиланмоқда.  

Шунингдек, тўловга қобилиятсизликнинг соғломлаштириш таомилларини ўтказиш жараёнида вужудга келган жорий солиқ тўловларини ҳисоблашни тўхтатиб туриш ва жараён муддати якунлангандан сўнг тўлаш, қарздорнинг тўлов қобилиятини тиклаш мақсадида тижорат банклари, молия ташкилотлари ва бошқа манбаларнинг маблағларини жалб этиш ҳамда соғломлаштириш режаларида олдиндан қарздорликнинг қанча қисмини қоплашни кўзда тутиш каби тартиблар ҳам қонун лойиҳасида ўз аксини топмоқда.  

Халқ вакилларининг таъкидлашича, мазкур қонун лойиҳасининг қабул қилиниши иқтисодий ночор корхоналар ва тадбиркорлик субъектларини молиявий инқироз ҳолатидан олиб чиқиш, Жаҳон банки ва Халқаро молия корпорациясининг “Бизнес юритиш” йиллик ҳисоботида Ўзбекистон Республикасининг рейтингини янада яхшилаш ҳамда хорижий инвесторларни жалб қилишда тадбиркорлик муҳитининг жозибадорлигини оширишга хизмат қилади.

Қизғин муҳокамалардан сўнг, қонун лойиҳаси биринчи ўқишда қабул қилинди.

Моҳигул Қосимова, ЎзА