Олий Мажлис Қонунчилик палатасидаги ЎзЛиДеП фракциясининг йиғилишида депутатлар фуқаролик ва иқтисодий суд ишларини соддалаштирилган тартибда кўриб чиқиш имкониятларини кенгайтиришга қаратилган қонун лойиҳасини муҳокама қилди.

Мазкур қонун лойиҳаси суд ишларини кўриб чиқиш муддатларини қисқартириш ва иқтисодий фаолиятнинг самарадорлигини оширишга қаратилган.

Фуқаролик процессуал ҳамда Иқтисодий процессуал кодексларига фуқаролик ва иқтисодий суд ишларини соддалаштирилган тартибда кўриб чиқишга асос бўлувчи даъво миқдорини ошириш бўйича ўзгартиришлар киритилмоқда.

Қайд этилганидек, қонун лойиҳасининг қабул қилиниши умумий тартибда кўрилаётган ишларнинг аксарият қисми соддалаштирилган тартибда кўрилишига асос бўлади.  

Шунингдек, бу ишлар бўйича суд қарорларининг кучга кириш муддати 30 кундан 10 кунга қисқариши натижасида банклар балансидаги ҳаракатсиз ва муаммоли активлар улуши камайиб, иқтисодий низолар тезроқ ҳал этилади.

Фракция аъзолари қонун лойиҳасини такомиллаштириш бўйича бир қатор таклифлар берди.

Муҳтарама Комилова,

ЎзА