Андижон шаҳридаги Ёшлар марказида Зулфия номидаги Давлат мукофотига номзодлар саралаш танловининг вилоят босқичи бўлиб ўтди.

Мамлакатимизда иқтидорли қизларни қўллаб-қувватлаш, ўз иқтидор ва салоҳиятини тўлақонли намоён этишлари учун кенг имкониятлар яратиб берилмоқда. Жумладан, Зулфия номидаги Давлат мукофоти танлови ҳам 14 ёшдан 30 ёшгача бўлган кўплаб иқтидор соҳибаларини юзага чиқармоқда.

Жорий йилда вилоятда мазкур танлов номзодларини саралаш бўйича туман ва шаҳар босқичларида 475 нафар иқтидорли қизлар қатнашган бўлса, вилоят босқичида адабиёт, санъат, фан, таълим, маданият, спорт ва жамоатчилик фаолияти йўналишлари бўйича 128 нафар иқтидор соҳибаси ўз имкониятини синовдан ўтказди.  

[gallery-9629]

– Зулфияхоним издошлари қаторидан жой олиш юртимиздаги ҳар бир қизнинг орзуси, ҳар бир қиз ўз ютуқлари билан ана шу номга сазовор бўлиш учун ҳаракат қилади, – дейди танловнинг санъат йўналиши иштирокчиси Дилҳавас Қодирова. – Имкониятларимизни яна бир бор синовдан ўтказдик. Насиб этса ижоди, фаолияти юқори баҳоланган энг муносиблар танловнинг кейинги босқичига йўлланма олади.

Якуний натижаларига кўра, турли йўналишлар бўйича энг яхши натижаларга эришган иқтидорли қизлар танловнинг мамлакат саралаш босқичида қатнашиш учун тавсия этилди.

Ф. УБАЙДУЛЛАЕВ,  

З. УМРЗОҚОВ (фото) ЎзА