Мамлакатимизда ипакчилик соҳасини модернизация қилиш, экспорт салоҳиятини ошириш, инвестицияларни жалб этиш ҳамда касаначиларни қўллаб-қувватлашга қаратилган изчил сиёсат ўзининг амалий самарасини кўрсатиб келмоқда.

Хусусан ўтган йил якунларига кўра, “Ўзбекипаксаноат” уюшмаси тизимидаги корхоналар томонидан 87 миллион АҚШ доллари миқдорида маҳсулот экспорт қилинди. Бу белгиланган режанинг тўлиқ бажарилганини англатиши билан бирга, ўтган йилга нисбатан 161 фоиз ўсиш қайд этилганини кўрсатади.  

–Инвестициялар йўналишида ҳам сезиларли ижобий натижалар кузатилди. 2025 йилда ипакчилик соҳасига 45,5 миллион доллар миқдорида хорижий инвестициялар ўзлаштирилди ва йиллик режа 100 фоиз бажарилди, –деди “Ўзбекипаксаноат” уюшмаси раиси Икромжон Сайфуллаев. – Бу кўрсаткич ўтган йилга нисбатан 27,5 миллион долларга кўп бўлиб, соҳага жалб этилган инвестициялар ҳажми бир йил ичида қарийб 153 фоизга ошганини англатади. Таққослаш учун, 2024 йилда инвестициялар ҳажми 18 миллион доллар бўлганини ҳисобга олганда, соҳанинг инвестицион жозибадорлиги сезиларли даражада ошгани яққол кўринади.

Шу билан бирга, бандлик кўрсаткичларида ҳам ижобий ўсиш қайд этилди. Хусусан, 2024 йилда ипакчилик соҳасида банд бўлганлар сони 1 миллион 222 минг 875 нафарни ташкил этган бўлса, 2025 йилда бу кўрсаткич 1 миллион 427 минг 850 нафарга етди. Жорий йилги ипак қурти парваришлаш мавсумларида республика бўйича 30,1 минг тонна тирик пилла етиштирилиб, белгиланган прогноз кўрсаткичлари тўлиқ бажарилди.

“Ўзбекипаксаноат” уюшмаси тизимида ижро интизомини кучайтириш ва самарадорликни оширишга қаратилган қатъий чоралар ҳам кўрилди. Қайта ишлаш қувватига эга бўлмаган, бир неча йиллар давомида прогноз кўрсаткичларини бажармаган ҳамда ижро интизомига риоя этмай келаётган 12 та корхона тизимдан чиқарилди.

Ипакчилик соҳасини давлат томонидан қўллаб-қувватлаш сиёсати ўтган йилда ҳам давом этди. Президентимизнинг тегишли қарорига мувофиқ, ипакчилик соҳасига берилган қатор солиқ ва молиявий имтиёзларнинг амал қилиш муддати 2029 йил 1 январга қадар узайтирилди. Хусусан, уй шароитида тирик пилла етиштирувчи касаначилар жисмоний шахслар даромад солиғидан, меҳнатига ҳақ тўлаш учун йўналтириладиган маблағлар ижтимоий солиқдан озод қилинди. Шунингдек, тутзорлар билан банд ер участкалари учун ер солиғини 0,1 коэффициент асосида тўлаш тартиби сақлаб қолинди.

2025 йил ипакчилик соҳасида кўп йиллардан бери меҳнат қилиб келаётган инсонларни рағбатлантириш йили сифатида ҳам қайд этилди. Президентимиз фармон ва фармойишлари билан “Ўзбекипаксаноат” уюшмаси тизимида самарали меҳнат қилиб келаётган қатор тадбиркорлар, агрономлар ва пиллачилар “Фаол тадбиркор” кўкрак нишони, “Меҳнат шуҳрати” ордени, “Шуҳрат” медали ҳамда фахрий унвонлар билан тақдирланди.

Шунингдек, ўтган йил “Ўзбекипаксаноат” уюшмаси учун экспорт ва инвестицияларда юқори ўсиш, ишлаб чиқаришда барқарорлик, тизимда қатъий тартиб-интизом ва касаначиликни кенг қўллаб-қувватлаш йили бўлди.

Гулноза Бобоева,ЎзА