Шу кунларда баҳорги пилла етиштириш мавсуми учун ипак қурти уруғлари Хитойдан келтирилиб, Тошкент вилоятининг 11 та ихтисослашган туманларига тарқатиляпти.

Мутахассисларнинг таъкидлашича, жами 20 минг 180 қути хориждан келтирилган ипак қурти уруғларининг ҳолати мўътадил, талафотлар йўқ. Муҳими, мазкур элита уруғларининг 1 қутисидан 58-60 килограмм ҳосил олиш режа қилинган.

 Тошкент вилояти “Агропилла” ташкилоти раҳбари Акром Эшонқулов бу жараёнлар қандай кетаётгани билан танишиб, масъуллар билан суҳбатлашди.  

Жорий йил биринчи ва иккинчи мавсумларда вилоят пиллакорлари томонидан 31 минг 746 қути инкубаторияларда очтирилган қуртлардан 2 минг тоннага яқин пилла етиштириш белгиланган. Ундан ўз навбатида қайта ишлаш тармоқларида “кумуш тола” олинади.  

Жойларда ипак қуртларини парваришлаш учун озуқа базаси яратилган. Далалар четлари ва махсус ҳудудларда тут дарахти плантациялари бор. Шу билан бирга, тут дарахти кўчатларини экиш ва парваришлаш ишлари ҳам самарали ташкил этилган. Бу билан туманлардаги 84 минг нафар аҳолининг бандлиги таъминланади.

Таҳлилларга кўра, 2024 йилда пиллани қайта ишлаш ҳисобига 10 миллион 700 минг АҚШ доллари миқдорида маҳсулот экспорт қилиш прогноз қилинди. Келгусида Тошкент вилоятининг пиллачилик тармоғини янада ривожлантириш ва хориж тажрибасидан самарали фойдаланиш борасидаги саъй-ҳаракатлар давом этади.  

Айни пайтда Бекобод, Бўка, Пискент туманларида 6 минг 400 дона қутидаги хитойдан келтирилган уруғларни жонлантириш ишлари бошлаб юборилди.

А. Мусаев, ЎзА мухбири