Россия Федерациясида қурилиш соҳаси бўйича ўз мавқеига эга йирик – “Ant Yapı” ҳамда “Стеллар Констракшн” компаниялари раҳбарлари Токман Хайри ва Владыко Максим инвестицион лойиҳаларни амалга ошириш мақсадида Наманган вилоятида бўлди.

Туркиянинг “Ant Yapı” қурилиш компанияси Россияда, айниқса, Москва шаҳрида йирик лойиҳаларни амалга ошираётган улкан хорижий девелоперлардан бири ҳисобланади. Ҳозирги пайтда компания объектларида қарийб 20 минг нафар Ўзбекистон фуқароси, шулардан 1,5 мингга яқини Наманган вилоятидан ҳамюртларимиз ишламоқда. 

Наманган вилояти ҳокими Шавкат Абдураззоқов жорий йилнинг шу йил октябрь ойида Россияга амалий хизмат сафари давомида мазкур компания қурилиш манзилида бўлиб, ватандошларимиз билан учрашган эди. 

Вилоят раҳбари хорижлик инвесторларни қабул қилиб, Наманган вилоятида амалга оширилаётган кенг кўламли қурилиш-бунёдкорлик ишлари, хусусан, Давлатобод туманида барпо қилинаётган “Янги Наманган шаҳарчаси”, кичик саноат зоналаридаги лойиҳалар ҳақида батафсил маълумот берди. 

Ўз навбатида, чет эллик сармоядорлар ҳам ўз компанияларининг имкониятлари, кейинги вақтларда олиб бораётган ишлари, келгуси режалари хусусида ўртоқлашди. Шунингдек, меҳмонлар шу йил май-июль ойлари давомида ўтказилган 64-Халқаро “Гуллар фестивали” ҳақидаги видеороликни томоша қилиб, келгуси йили бўладиган юбилей фестивалида иштирок этиш истагини билдирди. 

Хорижлик тадбиркорлар инвестиция киритиш учун Наманган вилоятидаги мавжуд имкониятларни жойига бориб, яқиндан кўриб чиқди.

Оқилхон Дадабоев, ЎзА.