Улар билан биргаликда вилоят иқтисодиётига инвестициялар киритиш ҳажмини кенгайтириш, хорижий капитал иштирокидаги корхоналарни ривожлантиришни қўллаб-қувватлаш, ҳар томонлама ҳамкорлик алоқаларини ўрнатиш бўйича салмоқли ишлар амалга оширилмоқда.

Вилоят ҳокимлигида мазкур давлатлар элчихоналари билан бўлиб ўтган видеоконференцияда ҳамкорликда амалга оширилаётган лойиҳалар таҳлил этилиб, янги инвестицияларни жалб этиш бўйича музокаралар олиб борилди. Онлайн мулоқотда шаҳар ва туман ҳокими ўринбосарлари-инвестициялар ва ташқи савдо бўлими бошлиқлари, элчихона ходимлари, хорижий компаниялар вакиллари иштирок этди.

Вилоят ҳокими ўринбосари М.Абдураҳмонов видеоконференцияда ҳамкорликдаги бу ишларнинг бугунги ҳолатига эътибор қаратиб, пандемия таъсирини юмшатиш борасида мамлакатимизда тадбиркорларга берилаётган имтиёзлар ҳақида сўз юритди.

Жанубий Кореянинг сармоядорлари билан вилоят тадбиркорлари самарали ҳамкорликни ўрнатган бўлиб, бу алоқалар йилдан йилга мустаҳкамланяпти. Амалга оширилган олий даражадаги ташрифлар доирасида қабул қилинган “йўл хариталар”ига Фарғона вилоятидан 10 та инвестиция лойиҳалари киритилган. Ўтган йилда Фарғона шаҳрида Корея халқаро университети очилиб ёшлар таҳсил олишни бошлади.

Қувасой шаҳрида ташаббускор “Grand Hayr Baraka” масъулияти чекланган жамияти ҳамда “Myung Sung Placon Ltd” хорижий ҳамкор компанияси билан биргаликда 5 миллион долларлик замонавий иссиқхона барпо этиляпти. Фарғона шаҳрида “Winchemical” масъулияти чекланган жамияти шаклидаги қўшма корхонасида полиэтилен девор қоғозлар ва изоляциялар, хўжалик ва болалар матлари ишлаб чиқаришни ташкил этиш лойиҳаси амалга оширилди.

Биргина ўтган йилда Жанубий Корея билан ташқи савдо айланмаси 33,5 миллион АҚШ долларини ташкил қилиб, вилоятдаги 13 та корхоналар томонидан экспорт амалга оширилди. Жорий йилнинг январ-апрел ойида эса ташқи савдо айланмаси 9,5 миллион долларни ташкил этмоқда.

2018 йилда очилган Фарғона шаҳридаги Латвиянинг Ахборот тизимлари менежменти Олий мактаби филиалида (ISMA) талабалар туризмда тадбиркорлик фаолияти ва уни бошқариш, меҳмонхона хўжалигини ташкил этиш ва бошқариш, ресторан хўжалигида тадбиркорлик фаолияти йўналишлари бўйича таълим олмоқда. Вилоятда бугунги кунда Латвия билан ҳам самарали ҳамкорлик изчил давом этмоқда. Ўтган йилда Тошлоқ туманидаги “POSCO International textile” хорижий корхонаси, Фарғона шаҳридаги “Фарғона Турон текстил”, Марғилон шаҳридаги “Ёдгорлик” масъулияти чекланган жамияти ва Фарғона туманидаги “Fergana France” қўшма корхонаси томонидан мазкур давлатга экспорт амалга оширилди.

Шунингдек, Фарғона вилояти ҳамда Уммон Султонлиги тадбиркорлари ўртасида ўзаро ҳамкорлик алоқаларини янада ривожлантириш борасида амалий ишлар олиб борилмоқда.

Мамлакатимизнинг мазкур давлатлардаги элчихоналари билан бўлиб ўтган видеоконференцияда инвестиция лойиҳаларини амалга ошириш ҳолати, тўғридан-тўғри хорижий инвестицияларни жалб этиш ва ўзлаштириш натижалари ҳақида сўз юритилди. Қишлоқ хўжалиги, саноат, туризм каби соҳаларда янги лойиҳаларнинг тақдимоти ўтказилди.

– Хорижлик инвесторлар бугунги кунда кўпроқ инфратузилмага эга бўлган вилоят марказига қизиқмоқда, – дейди Олий Мажлис Қонунчилик палатаси депутати Нодиржон Тилаволдиев. – Фарғонадаги барча шаҳар ва туманларда йирик инвестицявий лойиҳаларни амалга ошириш учун имкониятлар етарли. Айниқса, ҳудудларнинг ихтисослашувидан келиб чиққан ҳолда хорижий давлатлар билан янги лойиҳалар устида иш олиб бориш керак. Бугунги видеоконференцияда ана шу жиҳатларга алоҳида эътибор қаратилди.