ЎзЛиДеП Сиёсий Кенгаши Ижроия қўмитаси ва бир қатор вазирлик, ташкилотлар, партия фаоллари иштирокида ташкил этилган давра суҳбатида мамлакатимизнинг инвестицион муҳитини янада яхшилаш, экспорт салоҳиятини ошириш йўналишида амалга ошириладиган ишлар муҳокама қилинди.

2022–2026 йилларга мўлжалланган Янги Ўзбекистоннинг тараққиёт стратегияси ва уни «Инсон қадрини улуғлаш ва фаол маҳалла йили»да амалга оширишга оид давлат дастури ижросини таъминлаш мақсадида ЎзЛиДеПнинг «йўл харитаси» ишлаб чиқилди. Мазкур дастурни амалга ошириш борасида партиянинг ишчи гуруҳ аъзолари шакллантирилган.
Давра суҳбатида мамлакатимизда қулай бизнес ва инвестицион муҳитни шакллантириш масаласига партия жиддий ёндашаётгани қайд этилди. Бу борада  амалга оширилаётган чора-тадбирлар, қонунчиликнинг амалиётга татбиқи устидан кучли парламент ва депутатлик назоратини ўрнатиш кўзда тутилган. Ҳамкор ташкилотлар билан биргаликда марказда ва жойларда қулай бизнес ва инвестицион муҳитни шакллантириш борасида амалга оширилаётган ишлар мониторингини ташкил этиш, жамоатчилик назоратини йўлга қўйиш мақсад қилинган. 

Эътиборли жиҳати шундаки, келгуси беш йилда 120 млрд. доллар, жумладан, 70 млрд. доллар хорижий инвестицияларни жалб этиш учун ажратилади. Бу эса мамлакатимиз иқтисодиёти, хусусан, хусусий секторни янада ривожлантиришга катта ижобий туртки беради. 

ЎзЛиДеП фракцияси ва маҳаллий кенгашлардаги депутатлик гуруҳлари ҳар бир вилоятда лойиҳаларни молиялаштириш учун тўғридан-тўғри инвестициялар жамғармаси иштирокидаги «Холдинг компания» ташкил этилиши ва унинг фаолияти бўйича аниқ таклифлар ишлаб чиқилиши қайд этилди. 

Шунингдек Қонунчилик палатасидаги партия фракцияси ва маҳаллий Кенгашлардаги депутатлик корпуси вакиллари томонидан ягона Инвестиция кодексини ишлаб чиқиш бўйича аниқ ва асосли таклифлар ишлаб чиқилиши айтилди.

– Бундан ташқари, Бизнес-омбудсман билан ҳамкорликда  Инвестициявий омбудсман институти ташкил этилади, хорижий сармоядорлар учун тайёр инвестицион пакетларнинг электрон базасини шакллантириш ва тақдим этиш тизими янада такомиллаштирилади, – дейди Олий Мажлис Қонунчилик палатаси депутати,  ЎзЛиДеП фракцияси аъзоси Дониёр Ғаниев,  – Энг самарадор тадбирлардан бири шуки, партия тегишли вазирлик ва идоралар билан биргаликда ҳар бир ҳудуд кесимида ва уларнинг хусусиятларини инобатга олган ҳолда инвестицияларни жалб қилишга тўсиқ бўлаётган омилларни аниқлаш бўйича депутатлик назоратини йўлга қўяди ҳамда назорат-таҳлил натижалари асосида тегишли қонунчиликни такомиллаштириш борасида таклифларни ишлаб чиқиб, парламент муҳокамасига киритади. 

Давра суҳбати сўнгида масъул вазирликлар, тадбиркорлар ва ишбилармонлар қатор таклифлар, фикр-мулоҳазалар билдирди. Шунингдек, ушбу йўналишда белгилаб олинган вазифаларни ижросини таъминлашда ҳамкорликда ишлашга келишиб олинди.

Шаҳноза Маматуропова, ЎзА