Фарғона вилоятида 2025 йилда 1,1 млрд.долларлик экспорт амалга оширилди. 3,7 млрд.доллар, шундан 2,5 млрд.доллар хорижий инвестиция ўзлаштирилди. Бу рақамлар ортида вилоят раҳбарияти, идора-ташкилот масъуллари ва тадбиркорларнинг изчил ва машаққатли меҳнати турибди.

2026 йил режалари бунданда улкан ва уни амалга ошириш учун янги йилнинг дастлабки кунлариданоқ самарали фаолият олиб борилмоқда.

Сўнгги кунларда Фарғона вилояти ҳокими Хайрулло Бозоров бир неча мамлакатларнинг компания ва корпорациялари раҳбарлари билан учрашди. Жумладан,  Польша Республикасининг “NEMO” компанияси раҳбари Хенрик Видра бошчилигидаги делегация билан учрашувда Фарғона вилоятида маиший ва саноат чиқиндиларини қайта ишлаш, улардан энергия ҳамда ёқилғи (брикет), шунингдек, органик ўғитлар ва биогаз ишлаб чиқариш масалалари муҳокама қилинди.

Шунингдек, польшалик инвестор Хенрик Видра Фарғона вилоятида ўз компаниясини давлат рўйхатидан ўтказганини маълум қилиб, Ўзбекистон томони билан ҳамкорликда ишлашдан мамнун эканлигини таъкидлади.

Нидерландия Қироллигининг Вагенинген шаҳрида жойлашган “Delphy Co., Ltd” компанияси вакиллари билан учрашувда бош менежер Анна Пашкевич билан вилоятда қишлоқ хўжалигининг устувор йўналишлари – интенсив боғдорчилик, иссиқхона хўжалиги ва гулчилик тармоқларини ривожлантиришга қаратилган янги лойиҳалар муҳокама қилинди.

Қува туманида атиргулчилик, Фарғона туманида эса малиначилик йўналишларини замонавий талаблар асосида янги босқичга олиб чиқиш юзасидан фикр алмашилди.

Вилоят ҳокими Хайрулло Бозоров Хитойнинг “ZhangjiagangHuayiTextileCo., Ltd.” компанияси раҳбари Лю Вейлян бошчилигидаги делегaцияни ҳам қабул қилди.

Учрашувда тикув-тўқимачилик саноатини янада ривожлантириш, тайёр маҳсулотлар ишлаб чиқариш, дунёдаги машҳур бренд компаниялар билан ҳамкорлик қилиш, экспорт имкониятларини кенгайтириш масалалари муҳокама қилинди.

Шунингдек, Тошлоқ туманида фаолият олиб бораётган "AmiraTekstil"  МЧЖ билан Хитой компанияси ўртасида истиқболли лойиҳа амалга оширилаётгани таъкидланди.

Учрашув якунида "AmiraTekstil"  МЧЖ ва Хитой компанияси ўртасида ҳамкорлик келишуви имзоланди.

Шундай қилиб, Фарғона вилоятида 2026 йилга режалаштирилган 4 млрд.долларлик инвестиция маррасига эришиш учун ҳозирданоқ ишончли замин яратиляпти.  

Муҳаммаджон Обидов, ЎзА