Бухоро давлат педагогика институтида “Қорақалпоқ маданияти куни” деб номланган маданий-маърифий тадбир бўлиб ўтди.

Тадбирда Ажиниёз номидаги Нукус давлат педагогика институти ҳамда Бердақ номидаги Қорақалпоқ давлат университетидан ташриф буюрган талабалар, профессор-ўқитувчилар ва маданий фаоллар ҳам иштирок этди. Улар институтнинг фаоллар залида қизғин маданий дастурни намойиш этиш билан бирга, меҳрибонлик, ўзаро ҳурмат ва қадриятларга садоқат руҳини акс эттирди.

Тадбирнинг асосий қисми  қорақалпоқ театри, лирик қўшиқлар, миллий рақслар ва фольклор асарларидан иборат бўлиб, ҳар бир чиқиш орқали қорақалпоқ халқининг бой тарихи, маънавий мероси ва миллий урф-одатлари кенг аудиторияга батафсил етказилди. Ижодий саҳналаштиришлар нафақат миллий анъаналарни, балки тил, мусиқа, либос ва рақс орқали юксак маънавий қийматларни ҳам намоён этди.

[gallery-27745]

Тадбир давомида “Миллий таомлар фестивали” ҳам ташкил этилди. Унда Қорақалпоғистон Республикаси миллий ошхонасининг бетакрор намуналари — “Бешбармоқ”, “Маек борек”, “Жугури куртик”, “Тухум барак” каби анъанавий таомлар тайёрланди. Профессор-ўқитувчилар ҳамда талабалар биргаликда ушбу таомларни тайёрлаш жараёнини намойиш этди.

Тадбир давомида ёшлар, устозлар ўртасида мулоқот, фикр алмашиш ва амалий мулоқот учун кенг имконият яратилди. Бу борада ҳамкорликнинг муҳим жиҳатларидан бири сифатида таълим, маданият ва фан соҳасидаги қўшма лойиҳаларни амалга ошириш, талабалар алмашинуви ва маданий тадбирлар йўлга қўйилиши белгиланди.

– Биз бу каби тадбирларни ёшлар учун фақат маданий фестиваль шаклида эмас, балки маънавий ва маърифий йўналишда ташкил этилган баркамол ижтимоий муҳит сифатида кўрамиз, –дейди Бухоро давлат педагогика институти ректори Баҳодир Маъмуров. –Қорақалпоқ маданияти  бизнинг умумий маданиятимизнинг бир қисмидир. Ушбу учрашув ёшлар орасида маданиятлар ўртасидаги дўстликни янада мустаҳкамлаш, бирдамлик руҳини юксалтириш ва умумий инсоний қадриятларни халқимиз қалбига чуқур сингдиришда муҳим аҳамият касб этди.  

Мазкур маданий-маърифий учрашув ёшлар қалбида миллатлараро тотувлик, маданиятлараро мулоқот, умумий қадриятларга ҳурмат ва бағрикенглик руҳини мустаҳкамлашга хизмат қилди. Тадбир иштирокчилари қардош миллатларнинг тарихий-маънавий бойликларини чуқурроқ англаш, ўзаро ҳамжиҳатликни мустаҳкамлаш ва биргаликда истиқболли лойиҳалар устида ишлаш имконига эга бўлди.

Зариф Комилов, Тоҳиржон Истатов (сурат), ЎзА мухбирлари