Атрофимиз фақат нисбийликдан иборат. Бизга кўринган исталган нарса ҳақидаги хулоса ҳам бутунлай ҳақиқат эмас. Оддий софликни, мусаффоликни тасаввур қилинг. Дунёда нима борки, энг тоза, энг беғубор? Ҳаттоки, чақалоқ кўз ёшида ҳам ғубор бўлар экан. Шундай экан, хато қилишга мойил бўлган инсонлардан мукаммаллик талаб қилишимиз нечоғли ўринли?

Ачинарлиси шуки, орамизда ҳаётнинг маъноси фақат виртуал дунёдангина иборат деган хулоса билан яшаётганлар ҳам кўпайиб бормоқда. Ваҳоланки, аслида техник тараққиёт цивилизациянинг янги босқичи бўлиши мақсад қилинган. Бироқ, бугунги кунга келиб кишиларнинг ўзаро муносабатлари гўёки роботларникидан фарқи қолмагандек. Муаммо шундаки, инсон онги техник тизимга мослашиб қолиб, одамлардан ҳам мукаммаллик талаб қилина бошланди.  

Натижада кўнгил аталмиш муқаддас тушунча бироз ўз қадрини йўқотгандек. Унутмаслик лозимки, техник имкониятларнинг кенглиги яшаш тарзимизни енгиллаштириши мумкин. Аммо яқинларимиз, дўстларимиз берадиган фароғатни беролмайди. Шунинг учун ҳам халқимизда одам тафтини одам олади, деган нақл бор.

Бағрикенглик деган мўътабар тушунча бор. Бу инсонпарвар ва олийжаноб кишиларга бериладиган энг тўғри таъриф. Бироқ, бугунги кун кишилари жуда шошқалоқ ва бесабрдек тасаввур уйғотади. Бунинг оқибатида эса инсонлар ўртасидаги яқинлик ришталари тобора заифлашиб бормоқда. Эҳтимол шу сабабдан ҳам оила қураётганларнинг 50 фоизга яқинида ажрим ҳолатлари кузатилмоқда.

Хулоса қилиб айтганда ҳаётга соғлом қараш билан боқмоқ лозим. Шундагина умримизда ҳаловат, қалбимизда сокинлик туямиз. Айниқса, эшик қоқиб турган муқаддас Рамазон ойида қавм-у қариндош, дўст-у биродарларимиз даврасида кўпроқ вақт ўтказсак, мақсадга мувофиқ бўлади. Зеро, бу муқаддас китобларда ҳам алоҳида таъкидланган. Қолаверса, ушбу муборак ойда ранжитганларимизнинг кўнглини олиш, ранжиганларимизни эса кечиришимиз инсонийликнинг олий намунаси бўлади.

Шербек Исломов, ЎзА