Ренсселер Политехника институти (США) олимлари раҳбарлик қилган мутахассислар гуруҳи глобал иқлим исиши тезлашгани натижасида кўллардаги чучук сувларда кислород миқдори камайиб бораётганини қайд этишди. Мазкур тадқиқот натижалари яқинда Nature журналида чоп этилди.

Мутахассислар 393 та кўлнинг ҳолатини текшириб кўришди. Тадқиқот ишида 1941 йилдан то 2017 йилгача бўлган маълумотлар ўрганилди.

Маълум бўлишича, кўллар кислородини дунё океанларига қараганда 2,75-9,3 баробар тезроқ йўқотмоқда. Масалан, 1980 йилда тадқиқ этилган сув ҳавзалари юзасида кислород миқдори 5,5 фоизга, тубида эса 18,6 фоизга камайган.

Ушбу ўзгаришларга чучук сувларнинг ҳарорати ўн йил ичида 0,38 °C га ошгани сабаб бўлган, деб ҳисобламоқда экспертлар. Глобал исишнинг бундай оқибати кўк –яшил сув ўтларининг кўпайишига шароит яратади, улар чиқараётган токсинлар эса чучук сувларда яшаётган тирик организмлар учун хавф туғдиради.

Олимларнинг таъкидлашича, кислород даражасининг пасайиши анаэробли бактерияларнинг кўпайиши учун зарур бўлган шароитни яратади. Улар метан ис газини чиқаради, бу эса иқлимнинг ўзгаришини тезлаштиради.

Шундай қилиб, глобал исиш чучук сув захираларини тамом қилиши ва ундаги экотизим мувозанатини бузиши мумкин.