Bugungi shiddatli globallashuv va keskin raqobat davrida har bir davlat o‘z taraqqiyot yo‘lini belgilab olar ekan, eng avvalo, ichki imkoniyatlariga va mavjud inson kapitaliga tayanadi.

O‘zbekiston Respublikasi Prezidenti Shavkat Mirziyoyev ta’kidlaganidek, “Biz o‘z oldimizga qo‘ygan katta maqsadlarimizga faqat va faqat yuksak salohiyatli, bilimli va jismonan sog‘lom avlod bilan erisha olamiz”. Ayni kunlarda umumxalq muhokamasida bo‘lgan hamda jamiyatning barcha qatlamlari e’tiborida turgan “O‘zbekiston – 2030” strategiyasi aynan mana shu ezgu g‘oyani hayotiy haqiqatga aylantirishga qaratilgan konseptual dasturilamal hujjatdir. Ushbu strategiyaning tub mazmun-mohiyatida “Inson qadri uchun” degan ustuvor tamoyil mujassam bo‘lib, u shunchaki shior emas, balki har bir fuqaroning yashash sharoitini yaxshilash, uning huquq va erkinliklarini ta’minlash, eng muhimi, o‘z iqtidorini to‘laqonli namoyon etishi uchun munosib zamin yaratishga qaratilgan davlat siyosatining bosh yo‘nalishi hisoblanadi.

Davlat rahbari o‘z ma’ruzalarida inson kapitalini rivojlantirishni milliy xavfsizlik va kelajak farovonligining asosiy omili sifatida belgilab bergan. Shu bois, strategiyada ta’lim tizimini tubdan transformatsiya qilish va sifat jihatidan yangi bosqichga ko‘tarish eng ustuvor vazifa sifatida belgilangan. “Ta’limda sifat – Yangi O‘zbekiston taraqqiyotining yagona to‘g‘ri yo‘lidir” degan tamoyil asosida kelgusi yetti yil ichida maktabgacha ta’lim qamrovini 100 foizga yetkazish, umumta’lim maktablarida qo‘shimcha 2,5 million o‘quvchi o‘rni yaratish hamda oliy ta’lim bilan qamrov darajasini kamida 50 foizga oshirish ko‘zda tutilmoqda. Bu ko‘rsatkichlar nafaqat son jihatidan o‘sishni, balki ta’lim mazmunini mehnat bozorining zamonaviy talablariga moslashtirishni, har bir yoshning kamida ikkita chet tili va bitta zamonaviy kasbni egallashini kafolatlaydi.

Inson salohiyatini ro‘yobga chiqarishning muhim sharti sifatida tibbiyot tizimini isloh qilishga alohida urg‘u berilmoqda. Prezidentimiz tomonidan ilgari surilgan tibbiyotni “mahallagacha tushirish” va sifatini oshirish g‘oyasi strategiyaning ijtimoiy ustunini tashkil etadi. Aholining o‘rtacha umr ko‘rish davomiyligini 78 yoshga yetkazish, tibbiyotga ajratiladigan mablag‘lar hajmini ikki baravar oshirish hamda tibbiy sug‘urta tizimini to‘liq joriy etish kabi maqsadlar xalqimizning sog‘lom va uzoq umr ko‘rishi uchun mustahkam poydevor bo‘ladi. Zero, sog‘lom va jismonan barkamol insongina jamiyatda bunyodkorlik ishlariga qodir bo‘ladi va o‘z salohiyatini yuqori darajada namoyon eta oladi.

Iqtisodiy islohotlarning markazida esa inson farovonligi va uning daromadini oshirish masalasi turadi. Strategiyada mamlakat yalpi ichki mahsuloti hajmini 160 milliard dollarga yetkazish va aholi jon boshiga to‘g‘ri keladigan daromadni 4 ming dollardan oshirish maqsad qilib qo‘yilgan. Prezident Shavkat Mirziyoyev ta’kidlaganidek, “Bizning maqsadimiz – iqtisodiy o‘sish natijalarini har bir xonadonda, har bir inson hayotida his qilishga erishishdir”. Bunga erishish uchun tadbirkorlik tashabbuslarini qo‘llab-quvvatlash, eksport hajmini 45 milliard dollarga yetkazish va raqamli iqtisodiyotni rivojlantirish orqali yuqori qo‘shilgan qiymat yaratadigan ish o‘rinlarini ko‘paytirishga alohida e’tibor qaratiladi. Ayniqsa, “Sayxunobod” va “Uychi” tajribalari asosida kambag‘allikni qisqartirish, aholini kasb-hunarga o‘rgatish va tadbirkorlikka yo‘naltirish orqali ijtimoiy adolatni ta’minlash mexanizmi kuchaytirilmoqda.

Inson salohiyatini ro‘yobga chiqarish bevosita yashash muhiti va ekologik barqarorlik bilan ham bog‘liqdir. Davlat rahbarining “Yashil makon” umummilliy loyihasi va “yashil iqtisodiyot”ga o‘tish borasidagi tashabbuslari strategiyada keng qamrovli vazifalar sifatida belgilangan. Qayta tiklanuvchi energiya manbalari ulushini 40 foizga yetkazish, suv resurslaridan oqilona foydalanish va ekologik xavfsizlikni ta’minlash kelajak avlodlar oldidagi mas’uliyatimiz ifodasidir. Shu bilan birga, islohotlarni mahalla darajasigacha tushirish, “Obod xonadon – obod ko‘cha – obod mahalla” mezonlarini joriy etish orqali har bir fuqaro uchun qulay va xavfsiz yashash muhiti yaratilmoqda.

“O‘zbekiston – 2030” strategiyasi xalqimizning xohish-irodasi va Prezidentimizning qat’iy siyosiy irodasi mahsulidir. Unda belgilangan har bir maqsad va vazifa zamirida inson baxti, uning huquq va manfaatlari muhofazasi yotadi. Prezidentimiz ta’kidlaganlaridek: “Xalqimiz islohotlar samarasini ertaga emas, kelajakda emas, aynan bugun o‘z hayotida his qilishi kerak”. Strategiyaning izchil amalga oshirilishi O‘zbekistonni nafaqat iqtisodiy jihatdan kuchli, balki inson qadri va salohiyati eng oliy qadriyat bo‘lgan, demokratik va farovon davlatga aylantiradi. Bugungi umumxalq muhokamalari esa jamiyat va davlat birdamligining yorqin namunasi sifatida Yangi O‘zbekiston poydevorini yanada mustahkamlashga xizmat qiladi.

A.G‘afforov,

O‘zA