Россия ва Украина ўртасидаги инқироз борган сайин кучайиб, дунё ҳамжамиятини қаттиқ ташвишга солмоқда.

         Россиянинг 24 февраль куни Украинага бошлаган махсус ҳарбий амалиёти ҳануз давом этаётир. Шу куни ўз мурожаатида Президент Владимир Путин ҳарбий амалиёт бошлаш сабаби ҳақида тўхталиб, Донецк ва Луганск халқ республикаларининг ҳимояси зарурлигини таъкидлади. Россия уч кун аввал бу икки республиканинг мустақиллигини тан олган эди. 

Сентябрь ойи охирига келиб, Херсон ва Запорожье вилоятлари ҳамда Донецк ва Луганск халқ республикаларида референдумлар ўтказилди. 

         30 сентябрда эса Кремлда янги ҳудудларнинг Россия таркибига кириши тўғрисидаги шартномани Президент Путин ва ҳар тўрт вилоятнинг раҳбарлари имзолади. 

         Украина етакчиси Владимир Зеленский бундан кейин “Путин билан гаплашадиган гап қолмади”, деб баёнот берди ва ўтказилган “сохта референдумлар”ни тан олмаслигини ва бу воқеани Украинани аннекция қилишга уриниш, деб баҳолади.      

         Расмий Киев бу воқеага жавобан шошилинч равишда НАТОга аъзо бўлиб кириш учун Шимолий Альянсга ариза билан мурожаат қилди.

         Ҳарбий амалиётлар давом этар экан, Россияни Қрим ярим ороли билан боғлайдиган 19 километрли кўприкнинг ўртасида 8 октябрь куни юк машинаси портлаши оқибатида юк поездида ташилаётган саккизта ёқилғи цистернаси ёниб кетди. 

         Орадан икки кун ўтиб, Россия Украинанинг Қрим кўпригига етказилган зарар учун Киев ва бошқа бир қатор шаҳарларни ўққа тутди.

         Путиннинг “Бундан кейин мана шундай қўпорувчи ҳаракатларга Россия бундан-да шиддатли жавоб беради”, деган огоҳлантиришига, Зеленский “Биз террористлар билан юзма-юзмиз”, деган жавобни берди.

         Россиянинг бу сўнгги амалиёти дунёнинг турли давлатлари ва халқаро ташкилотлар томонидан турли хил қарашларга сабаб бўлди. 

Хусусан, Европа Иттифоқи дипломатияси раҳбари Жозеп Боррель ижтимоий тармоқлар орқали “Биз Украинани қўллаб-қувватлаймиз. Европа Иттифоқининг ёрдам бериши давом этади”, деб баёнот беради.

         Рим Папаси Франсиск “катта хавф” ва “инсоният учун оғир кунлар” ҳақида гапиради.

      Ҳиндистон Ташқи ишлар вазирлиги Россия – Украина можаросининг чуқурлашиб бораётганидан хавотир билдирди. Расмий Нью-Дели “ҳарбий ҳаракатларни зудлик билан тўхтатиш”га чақирди ва “шартсизликни камайтиришга қаратилган барча саъй-ҳаракатларни қўллаб-қувватлашга” ваъда берди, деб ёзди “The New York Times”. 

    Кўриниб турганидек, икки давлат ўртасидаги зиддият-инқироз дунё сиёсатига, иқтисодиётига жиддий таъсир кўрсатмоқда. Жаҳон ҳамжамияти Россия ва Украинани мазкур вазиятни тинч йўл билан ҳал қилиш учун чора-тадбирлар кўришга чорламоқда.

А.Ғуломов, ЎзА