Бугун борган сари юртимизда босма нашрларнинг сони камайиб боряпти. Ҳатто айрим зиёлилар томонидан ҳам босма газета-журналларнинг яшаб қолишига шубҳа билдирилмоқда.

Матбуот ана шундай мураккаб даврни босиб ўтаётган паллада мутлақо янги йўналишдаги “Инноватор” журнали нашр қилинди.  

Журнал Инновацион ривожланиш вазирлиги ва “Улуғбек” жамғармаси ҳамкорликда таъсис этилган. Бугун мазкур журналнинг тақдимот маросими ўтказилди.  

Ўзига хос, замонавий руҳда бўлиб ўтган тақдимотга асосан ёшлар ташриф буюрди. Интернет асрида улғайган ёш авлоднинг журналга катта қизиқиш билдираётгани ҳайратланарли. Шу сабаб уларнинг журнал ҳақидаги фикри билан қизиқдик.  

Тақдимотга келган талаба, ихтирочиликка қизиқувчи Шоҳрух Аъзамовнинг айтишича, журналда дунё миқёсидаги илғор инновацияларнинг содда ва тушунарли услубда ёритилгани унинг эътиборини тортган. Шунингдек, Ўзбекистондаги ихтирочи тенгдошлари ҳақида ёзилган мақолаларга қизиқиш билдирган.  

– Одатда мен газета-журнал ўқимас эдим. Эҳтимол газета ўқишим учун мени ҳайратлантирадиган ва ўзига жалб қиладиган сабаб бўлмагани учундир. Асосан, китоб мутолааси ва ижтимоий тармоқлар орқали маълумот оламан. Аммо, “Инноватор”нинг ўзига хослиги ва қизиқарлилиги мени ўзига жалб қилди. Ундаги 8 ёшли қизнинг ноёб ихтироси ҳақидаги кичик мақолани бир нафасда ўқиб чиқдим, –дейди у.   

“Инноватор” илмий- техникавий, таҳлилий, оммабоп журнали нафақат босма, балки электрон шаклда ҳам нашр этилмоқда. Шунингдек, ижтимоий тармоқларда ҳам ўз саҳифасини юритади. Бу ҳақда журнал бош муҳаррири Севара Абдуллаева тақдимотда маълум қилди.  

Журналнинг илк сони 500 нусхада чоп этилган. Уни варақлар экансиз, ҳайратланарли ихтиролари билан дунё нигоҳига тушган инноваторларни яқиндан таний бошлайсиз. Нафақат жаҳон майдонидаги, балки юртимизда ҳам илғор ғоялари билан янги даврни бошлашга қадам қўяётган ёшлар билан танишасиз. 

Мафтуна КАРИМОВА, ЎзА